„Allan hringinn í kringum landið erum við sjómenn að upplifa mokfiskerí bæði grunnt og djúpt og nánast á hvaða veiðarfæri sem er. Sjórinn er sem sagt kjaftfullur af fiski. Á sama tíma ákveður Hafrannsóknastofnun að skera veiðiheimildir í þorski niður um 6% til viðbótar við 13,5% niðurskurð í fyrra. Í karfa er niðurskurðurinn á milli ára hvorki meira né minna en 20% enda þótt hann mokveiðist hvar sem menn bleyta í veiðarfærum.“

Þetta skrifa þeir  Björn Jónasson, skipstjóri á Málmey SK-1, og Ágúst Ómarsson, skipstjóri á Drangey SK-2, í pistli á vef FISK Seafood um veiðiráðgjöf Hafrannsóknastofnunar fyrir næsta fiskveiðiár.

Björn og Ágúst eru ekki fyrstu skipstjórarnir sem gagnrýna ráðgjöf Hafrannsóknastofnunar opinberlega, en á dögunum sagði Eiríkur Jónsson, skipstjóri á Akurey AK, sem sagði forsendur lækkun í ráðgjöf fyrir gullkarfa vera „hreint bull“.

Frétt af mbl.is

Forsenda karfaráðgjafar „hreint bull“

Telja skipstjórarnir Björn og Ágúst galna afstöðu Svandísar Svavarsdóttur, matvælaráðherra, að fara eftir ráðgjöf vísindamanna við ákvörðum um hámarksafla næsta fiskveiðiárs þar sem starfsmenn Hafrannsóknastofnunar eru sagðir „gefa sér rangar forsendur“.

Skora þeir á Svandísi að kalla á „nokkra af reynsluboltum sjómannastéttarinnar“ til fundar til að kynna sér „raunveruleikann í lífríki sjávar eins og hann blasir við þeim sem vinna á sjónum.“ Telja skipstjórarnir æskilegt komið yrði á samráðsvettvangi skipstjórnarmanna og sérfræðinga Hafrannsóknastofnunar

Á villigötum

„Villigötur Hafró eru því miður alltof vel þekktar á síðustu árum og áratugum. Það er hins vegar verra þegar ráðherra matvæla og um leið sjávarútvegs lýsir því yfir fyrir nokkrum dögum að það sé stefna stjórnvalda að fara í einu og öllu að ráðgjöf þeirra sem gefa sér rangar forsendur í reikniforritum og fá fyrir vikið kolvitlausa útkomu. Hvaða pólitíska linkind er það? Á eina ferðina enn að hneigja sig og beygja fyrir E-listanum, „Embættismannalistanum“ sem öllu ræður en hefur aldrei verið kosinn? Það er að okkar mati galin afstaða hjá ráðherra og ráðuneyti sem verður að hafa þekkingu og reynslu til þess að mynda sér sjálfstæða skoðun á því hvað sé rétt og rangt þegar um er að ræða verðmæti sem skipta tugum eða jafnvel hundruðum milljarða króna fyrir þjóðarbúið,“ skrifa þeir.

Fagna þeir Björn og Ágúst því að á undanförnum áatugum hafa verið ráðherrar sjávarútvegsmála sem kosið hafa að fara þvert á ráðleggingar Hafrannsóknastofnunar, og fullyrða að ekki hafi verið sýnt fram á að ákvarðanir stakra ráðherra um að hafna ráðgjöf og auka kvóta hafi haft alvarlegar afleiðingar.

„Við höfum fylgt vísindalegri ráðgjöf um fiskveiðarnar að verulegu leyti í 30 ár og síðustu 5-6 árin án nokkurra undantekninga. En alltaf minnkar tiltrú sjómanna á að rétt sé að málum staðið. Sjórinn er alls staðar spriklandi af lífi en samt er skorið niður eins og enginn sé morgundagurinn. Ráðgjöfin er ekki bara að okkar mati, heldur langflestra reyndustu skipstjóra og sjómanna landsins, algjört rugl,“ skrifa skipstjórarnir.