Vonir standa til þess að að nýtt viðvörunarkerfi verði sett upp í Reynisfjöru í mánuðinum „eða á allra næstunni“, að sögn Björns Inga Jónssonar, verkefnastjóra almannavarna hjá lögreglustjóranum á Suðurlandi.

Björn segir að unnið sé hörðum höndum að því að hanna skiltið og koma því fyrir í fjörunni en að nákvæm dagsetning liggi þó ekki fyrir.

Hann bendir á að verið sé að finna kerfinu undirstöðu og hanna það um leið en það þarf að hanna eftir því hvert það fer. „Svo það er hvort tveggja í vinnslu og allt á fullri ferð svo vonandi fer það að birtast fljótlega,“ segir Björn.

Mikil umræða skapaðist um aðgengi ferðamanna að Reynisfjöru og hvernig væri hægt að koma í veg fyrir banaslys eftir að erlendur ferðamaður lést þar í júní.

Frétt af mbl.is

Bið á uppsetningu viðvörunarkerfis

Skilti með viðvörunarljósum

Skiltið sem um ræðir verður með viðvörunarljósum og byggist meðal annars á öldusporkerfi Vegagerðarinnar á grunnsævi en að sögn Björns á að nota það til að stýra viðvörunarskiltum.

Hann bendir þó á að kerfið gefi ekki til kynna að það sé öruggt að vera í fjörunni heldur að það sé „kannski misvarhugavert að vera þarna“.

Sett verður eitt viðvörunarskilti og á því verða ljós, bæði gul og rauð. Byggt er á sömu hugmyndafræði og sést oft á ströndum erlendis þar sem notuð eru flögg. Fyrir neðan blikkandi ljósin verður svo kerfið útskýrt.

Frétt af mbl.is

Þriðjungur vill hefta aðgengi að Reynisfjöru

Frétt af mbl.is

Andvaraleysi ekki til að dreifa

„Svo erum við líka að vinna í minni leiðbeiningarskiltum á svæðinu og reyna að búa til heilsteypt upplýsingaflæði til að fanga athygli ferðamanna þannig að þeir átti sig á aðstæðum þarna.“

Björn bætir við að kerfið sé unnið í góðri samvinnu við landeigendur, Ferðamálastofu, Vegagerðina og Veðurstofuna.