Franska tískuhúsið Chanel er í hefðarkattagírnum þetta haustið. Í haustlínunni eru varalitir og naglalökk pöruð saman þannig að ekkert stingi í stúf. Hér er ekkert verið að flippa þegar kemur að litum og áferð. Klassíkin er allsráðandi.

Vetrarlínan kallast Les Accords de Chanel og þar eru engar öfgar og engin skringilegheit. Í Rouge Allure-varalitalínunni er hægt að fá 12 mismunandi liti af varalitum. Einhver gæti spurt sig að því hvers vegna það þurfi að vera til 12 litir sem eru keimlíkir en einfalda svarið er að fólk ætti að velja varalit út frá litatónum húðarinnar þannig að varaliturinn ýti undir fegurð húðarinnar. Ef það er mjög blár undirtónn í varalitnum þá virka tennurnar til dæmis gulari og húðin fölari en ef það er hlýr undirtónn þá virka þær hvítari og andlitið frísklegra. Ef þú ert búin/n að vera með sama varalitinn síðan Skuggabarinn var vinsæll hér um árið þá mætti kannski skipta um lit og áferð. Ef þú ert sú eða sá sem fer alltaf öruggu leiðina þá mætti dekkja litinn örlítið. 212-liturinn í Rouge Allure-línunni er til dæmis svolítið vetrarlegur og á sama tíma með konunglegt yfirbragð. Hann fer til dæmis vel við perlufestar og öll svörtu fötin sem fylla fataskápa íslenskra kvenna.

Perlufestar eru áberandi í hausttískunni en þær fara vel við örlítið dekkri varir og naglalakk í jarðlitum.

Þegar rétti litatónninn er fundinn á varirnar má finna lit á neglurnar. 949 Déndué er til dæmis ljós og gefur nöglunum snyrtilegt yfirbragð. Þetta er liturinn fyrir fólk sem vill vera öruggt. Ef þú vilt dekkja litinn örlítið þá er 953 Essentel æði og ef fólk kann að meta bleikbrúnni tón þá er 945 Émotion heillandi. Naglalökk ramma inn heildarsvip hverrar manneskju. En það sem kannski færri átta sig á er að það getur verið róandi að naglalakka sig. Þú átt í erfiðleikum með að gera eitthvað annað á meðan þú ert að lakka neglurnar. Með því að naglalakka sig er því hægt að sameina tvennt mjög mikilvægt; að fegra hendur og hvíla hugann á sama augnablikinu.

Í Rouge Allure varalitalínunni eru 12 litir.

Chanel leggur áherslu á að neglur og varir séu í sama stíl þennan veturinn.