Stjórn Vinnslustöðvarinnar og hluthafar í Ósi ehf. og Leo Seafood ehf. skrifuðu í gær undir viljayfirlýsingu um kaup Vinnslustöðvarinnar á öllu hlutafé í félögunum tveimur. Ef samningar ganga eftir mun Vinnslustöðin því eignast Þórunni Sveinsdóttur VE-401 sem er núna rekin af Ós ehf. og aflaheimildirnar og fiskvinnsluna sem rekin er nú af Leo Seafood ehf.

Stóru útgerðirnar stækka

„Þetta eru rétt rúmlega 4000 þorskígildistonn,“ segir Sigurgeir Brynjar, sem alla jafna er kallaður Binni í Vinnslustöðinni, um aflaheimildir Þórunnar VE-401.

„Ég er nú þeim megin í lífinu að ég hef ekki gaman af því að sjá sjálfstæðum útgerðum fækka. En við erum ánægð með að þegar sala stendur fyrir dyrum hjá útgerðum hér þá hafa þær nánast undantekningalaust snúið sér til annarra útgerðarfélaga í Eyjum.“ Binni segir engar sérstakar breytingar fyrirhugaðar á starfseminni. „Við erum bara að gera út og vinna fisk, svo það breytist ekkert. Þórunn er glæsilegt og gott skip og þetta er góð útgerð.“

Hann segir verðið vera trúnaðarmál en ekki sé verið að hugsa um hlutabréf í Vinnslustöðinni sem greiðslu. Nú hefst vinna við uppgjör fyrirtækjanna og áætlað er að salan gangi í gegn á næsta ári.

Á starfsmannafundi í gærmorgun kom fram að útgerðarmaðurinn Sigurjón Óskarsson og fjölskylda hans, sem eiga bæði félögin, ætli að einbeita sér meira að laxeldinu og byggja það upp í Eyjum.