„Guðlaugur Þór hefur svo sannarlega ekki setið auðum höndum – ég er ekki bara að tala um síðan á sunnudaginn,“ sagði Bjarni Benediktsson, formaður Sjálfstæðisflokksins, í setningarræðu sinni á landsfundi sem var settur í dag og skaut þar að mótframbjóðenda sínum í framboðskjöri sem fer fram á sunnudag. 

Frétt af mbl.is

Beint: Setningarræða Bjarna á landsfundi

Bjarni fór um víðan völl í ræðu sinni og þakkaði meðal annars ráðherrum Sjálfstæðisflokksins fyrir sín störf en hann nýtti einnig tækifærið til að skjóta að stjórnarandstæðingum sínum. 

Hann óskaði Kristrúnu Frostadóttur, nýjum formanni Samfylkingarinnar, til hamingju með nýja hlutverkið og þakkaði henni fyrir góð störf í þágu skólanefndar Garðabæjar þar sem hún var um árið varamaður fyrir hönd Sjálfstæðisflokksins.

Gestir fundarins hlógu mikið og klöppuðu ákaft í kjölfar þessarra hamingjuóska. 

Leikskóladeild í Ráðhúsi Reykjavíkur

Bjarni skaut einnig að rekstrarhalla Reykjavíkurborgar og að Degi B. Eggertssyni borgarstjóra. 

Frétt af mbl.is

Dagur: Nýju reglurnar ná ekki til framlínuþjónustu

„Það var magnað að heyra borgarstjóra – alveg magnað – að heyra borgarstjóra tala um það, dimmraddaðan, að héðan í frá verði aðeins ráðið fólk hjá borginni ef það er nauðsynlegt,“ sagði Bjarni.

„En hvaða stöður skyldu þetta nú vera sem Degi þykja ónauðsynlegar? Ekki eru það allir millistjórnendurnir í Ráðhúsinu eða ímyndarsmiðir borgarstjóra, sem segja fjölmiðlum að borgarstjórinn sé ekki við, þegar spyrja þarf út í vondar fréttir.

Nei, samkvæmt áætlun borgarinnar virðist helst stefnt að fækkun starfsfólks í leikskólum. Á sama tíma hlýtur þá að opna ný leikskóladeild í Ráðhúsi Reykjavíkur, þarna við Tjörnina, þar sem foreldrar hafa undanfarið sest að með börn sín, innan um nauðsynlega jafnt sem ónauðsynlega starfsmenn, þar hafa þeir verið til að ýta á fá pláss sem þeim var úthlutað, en reyndust ekki til.“

Að lokum sagði Bjarni að tími væri kominn til að gefa borgarbúum frí frá Samfylkingunni.