Þeir sem stýra kosningabaráttum í Bandaríkjunum um þessar mundir var verulega brugðið vegna hópuppsagna starfsfólks Twitter, undir stjórn Elon Musk. Blikur eru á lofti um að sá mannskapur sem eftir stendur muni ekki geta staðið undir álaginu. 

Frétt af mbl.is

Musk segir upp helmingi starfsfólks

Fjórir dagar eru til stefnu uns kosið verður í þingkosningum í Bandaríkjunum. 

Samskiptafulltrúar og falsfréttaverðir

Greint hefur verið frá því að Elon Musk skar starfsmannafjölda fyrirtækisins niður um helming. Þar á meðal heilu teymin sem hafa unnið að því að berjast við upplýsingaóreiðu og falsfréttir í aðdraganda kosninga og verið í samskiptum við blaðamenn, opinbera starfsmenn og starfsfólk kosningaskrifstofa. 

Þetta fólk átti að vera á vaktinni gagnvart falsfréttum sem stöfuðu frá erlendum ríkjum, eða annars konar skaðlegri umfjöllun, að því er fram kemur í frétt Washington post. Nú hafa fulltrúar stjórnmálaflokkanna, sem eru vanir að vera í nánum samskiptum við starfsfólk Twitter, tekið eftir því að það tekur fleiri klukkustundir að fá svör og hafa því áhyggjur af því að uppsagnirnar hafi þau áhrif á fyrirtækið að mannskapurinn sem eftir er ráði ekki við álagið. 

Veruleg tekjuskerðing vegna þrýstihópa

Elon Musk hefur varið þessa uppsögn með tístum á samskiptamiðlinum, þar sem hann segir að Twitter hafi þurft að þola verulegar tekjuskerðingar vegna áhrifa frá þrýstihópum sem vinni að því markmiði að útrýma tjáningarfrelsi í Bandaríkjunum. 

Nánar tiltekið heldur hann því fram að fyrirtækið tapi fjórum milljónum Bandaríkjadala á dag vegna þessa, eða 584 milljónum króna.