Sergei Lavrov, utanríkisráðherra Rússlands, sagði á G20-ráðstefnunni í Indónesíu að skilyrði Úkraínumanna fyrir því að hefja á nýjan leik samningaviðræður við Rússa væru „óraunhæf“.

Á ráðstefnunni var settur mikill þrýstingur á Rússa um að binda enda á stríðið í Úkraínu.

Frétt af mbl.is

Lavrov viðstaddur ávarp Selenskís

 „Öll vandamálin eru hjá Úkraínu, sem neitar staðfastlega að fara í samningaviðræður og setur fram skilyrði sem eru augljóslega óraunhæf,“ sagði Lavrov við blaðamenn.

Hann sagðist hafa nefnt þetta á fundi sínum með Emmanuel Macron Frakklandsforseta og að hann hafi útskýrt afstöðu Rússa í viðræðum við Olaf Scholz, kanslara Þýskalands.

Volodimír Selenskí, forseti Úkraínu. AFP

Embættismenn Rússa og Úkraínumanna héldu þó nokkrar samningalotur við upphaf stríðsins, þar á meðal með aðkomu Receps Tayyips Erdogans Tyrklandsforseta, en þær báru ekki árangur.

Frétt af mbl.is

Erdogan segir Selenskí og Pútín vini sína

Volodimír Selenskí, forseti Úkraínu, segir úkraínsk stjórnvöld ekki geta samið við Rússa á meðan Vladimír Pútín Rússlandsforseti er við völd.