Stjórnendur Vinnslustöðvarinnar hafa ákveðið að hætta að gera út Brynjólf VE-3 og leggja skipinu. Áhöfninni var tilkynnt þetta í gær og öllum skipverjum jafnframt sagt upp störfum.

Þetta kemur fram í tilkynningu sem birt hefur verið á vef útgerðarinnar. Þar segir Sigurgeir B. Kristgeirsson, framkvæmdastjóri Vinnslustöðvarinnar, tíðar bilanir og kvótaskerðingu ástæðurnar fyrir ákvörðuninni, en reynt verður að finna pláss fyrir áhöfnina á öðrum skipum.

Ekki er um að ræða fyrsta skipið sem lagt er af þessum ástæðum á árinu, en Stefni ÍS var lagt í september og áhöfn sagt upp vegna skorts á aflaheimildum. Einnig er vitað til þess að Harðbak EA hafi verið lagt tímabundið, en þeirri áhöfn var útvegað önnur störf á öðrum skipum.

Frétt af mbl.is

Allri áhöfninni á Stefni sagt upp

Sigurgeir B. Kristgeirsson, framkvæmdastjóri Vinnslustöðvarinnar í Vestmannaeyjum. mbl.is/Óskar Pétur Friðriksson.

„Við höfum annars vegar lent í tíðum bilunum með Brynjólf undanfarna mánuði með tilheyrandi truflunum í útgerð og kostnaði. Það sér ekki fyrir enda á þeim vandræðum. Þess vegna getum við ekki treyst því að rekstur skipsins gangi eðlilega fyrir sig framvegis enda skipið orðið gamalt og slitið,“ útskýrir Sigurgeir.

„Hins vegar hefur svo kvótaskerðingin í karfa áhrif. Við höfum einfaldlega ekki nægar aflaheimildir í karfa fyrir þau þrjú togskip sem við gerum út. Þetta er staðan og við henni þarf að bregðast.  Við munum leitast við að útvega skipverjum á Brynjólfi pláss á öðrum skipum Vinnslustöðvarinnar eftir því sem unnt er.“