Frá fiskveiðiárinu 2019/2020 til fiskveiðiársins 2022/2023, sem hófst í september síðastliðnum, hefur þorskkvótinn verið skertur um 24% eða 50 þúsund tonn af slægðum afla.

Skerðingin í þorski er jafn mikil og tíu aflamestu togararnir fiskveiðiárið 2019/2020 lönduðu af tegundinni það ár, að því er fram kemur í umfjöllun Morgunblaðsins í dag.

Samhliða skerðingum í þorski hafa aflaheimildir í gullkarfa verið skertar um 42%, auk þess sem 49% skerðing hefur átt sér stað í djúpkarfa.

Útgerðir hafa aðlagað veiðarnar skerðingunum með því að fækka skipum, fækka úthaldsdögum og aukið sókn í aðrar tegundir. Tilkynnti meðal annars Vinnslustöðin í dag að útgerð Brynjólfs VE hefur verið hætt.

Frétt af mbl.is

Brynjólfi VE lagt við bryggju og áhöfn sagt upp

Nýverið tilkynnti Samherji að Harðbaki EA, einn af aflamestu togurum landsins, hafi verið lagt tímabundið vegna skorts á aflaheimildum, en áhöfninni hefði verið fundin störf á öðrum skipum félagsins. Þá var tilkynnt í september síðastliðnum að útgerð Stefnis ÍS yrði hætt af sömu ástæðum.

Lesa má meira um málið í Morgunblaðinu í dag.