Sunneva Ósk Guðmundsdóttir hefur verið ráðin í stöðu framleiðslustjóra landvinnslu Útgerðarfélags Akureyringa, en hún gegndi áður stöðu gæðastjóra félagsins. Þá tekur Unnur Inga Kristinsdóttir, sölufulltrúi hjá Ice Fresh Seafood, við starfi Sunnevu sem gæðastjóri landvinnslu, en Gyða Birnisdóttir hefur verið ráðin sem sölufulltrúi hjá Ice Fresh Seafood.

Þetta kemur fram í tilkynningu á vef Samherja.

Þar segir að Sunneva Ósk, Unnur Inga og Gyða séu allar sjávarútvegsfræðingar frá Háskólanum á Akureyri og að hjá Samherja og tengdum félögum starfi hátt í þrjátíu sjávarútvegsfræðingar. „Reynsla Samherja af útskrifuðum sjávarútvegsfræðingum er góð og greinilegt að námið er góður grunnur fyrir fólk sem ætlar að starfa í alþjóðlegri atvinnugrein eins og sjávarútvegurinn er,“ segir í tilkynningunni.

Frétt af mbl.is

„Fylgjast þarf með hverju skrefi“

Sunneva Ósk gegndi stöðu gæðastjóra landvinnslu Samherja í tvö og hálft ár og hefur starfað við gæðamál hjá ÚA og Samherja í nærri fimm ár. Hún er sjávarútvegsfræðingur frá Háskólanum á Akureyri og með MS gráðu í forystu og stjórnun með áherslu á mannauðsstjórnun frá Háskólanum á Bifröst.

Unnur Inga hefur undanfarin fimm ár starfað sem sölufulltrúi hjá Ice Fresh Seafood, sem sér um sölu afurða Samherja, dótturfélaga þess og annarra framleiðenda. Hún er sjávarútvegsfræðingur frá Háskólanum á Akureyri og með MBI gráðu í alþjóðlegum viðskiptum frá Háskólanum á Bifröst.

Gyða er í tilkynningunni sögð hafa „starfað lengi við sjávarútveg og þekkir greinina svo að segja frá öllum hliðum. Hún kemur að sölu afurða Samherja, dótturfélaga og annarra framleiðenda. Hlutverk hennar er meðal annars að vera tengiliður við viðskiptavini víðs vegar um heiminn og tryggja að afurðir berist þeim á tilsettum tíma.“ Gyða er sjávarútvegsfræðingur frá Háskólanum á Akureyri.