Frumkvöðlar og sprotar framtíðarinnar komu saman á Akureyri á kynningu Gulleggsins, stærstu frumkvöðlakeppni Íslands á dögunum. Kynningin fór fram á Vamos við ráðhústorgið þar sem stjörnutvíeykið í Úlfur Úlfur gaf tóninn og trylltu lýðinn.

Vamos fylltist af sprotum, frumkvöðlum og fólki sem ganga með góðar hugmyndir í maganum til að hlýða á kynningu Gulleggsins. Gríðarleg góð stemmning myndaðist þegar öll áttu möguleika að vinna ferð suður á Masterclass Gulleggsins í janúar. Það var hann Ívar Örn Marteinsson sem vann en hann er einn stofnenda sprotans Pelliscol sem tók þátt í viðskiptahraðlunum Vaxtarými í umsjá Norðanáttar, stoðumhverfi fyrir frumkvöðla og fyrirtæki á Norðurlandi.

Kynningar á Gullegginu fór vonum framar en Landsbankinn, KPMG, Hugverkastofa, Marel og Controlant, bakhjarlar Gulleggsins voru með eigin kynningarbása þar sem fulltrúar fyrirtækjanna voru í góðu stuði og kynntu starfsemi sína. Controlant var í fyrsta skiptið með á kynningarviðburði Gulleggsins en þau unnu Gulleggið árið 2009 og er því fyrsti bakhjarlinn sem unnið hefur Gulleggið.

„Við erum gríðarlega stolt af því að vera bakhjarl Gulleggsins og af því að geta gefið tilbaka og stutt við nýsköpunarsamfélagið á Íslandi. Keppnin skipar sérstakan sess í sögu Controlant, sem árið 2009 vann Gulleggið og var viðurkenningin gríðarleg hvatning fyrir stofnendur Controlant. Það var æðislegt að koma til Akureyrar og finna fyrir kraftinum í fólkinu þar, en miðað við samtölin er framtíðin heldur betur björt í nýsköpun á Íslandi, og við spennt að fá að fylgjast með og styðja við frumkvöðla framtíðarinnar,“ segir Helga Bestla Baldursdóttir og Auðbjörg Ólafsdóttir hjá Controlant.

„Við erum mjög ánægð með hversu vel gekk og hvað margt mætti á kynningu Gulleggsins. Það er alltaf einstakt að koma norður á Akureyri og finna fyrir öflugu tengslaneti frumkvöðla og sprota sem brenna fyrir nýsköpun. Við hlökkum til að sjá sem flesta fyrir norðan skrá sig í Gulleggið,“ sagði Ása María Þórhallsdóttir, verkefnastjóri Gulleggsins.