„Allt útheimtir þetta umtalsverða fjármuni eins og það er stjórnvalda að leggja mat á þá viðbragðsgetu sem nauðsynleg er hér við land,“ segir Georg Lárusson, forstjóri Landhelgisgæslu Íslands, í blaði 200 mílna um sjávarútveg sem fylgir Morgunblaðinu í dag.

Tilefni orða forstjórans er niðurstaða höfunda skýrslu um mat þjóðaröryggisráðs á ástandi og horfum í þjóðaröryggismálum. Þar segir að geta Landhelgisgæslu Íslands til að hafa eftirlit með umferð um efnahagslögsöguna og landhelgina sé ekki tryggð og að rekstur eftirlitsflugvélar stofnunarinnar sé ekki tryggður allt árið. Auk þess er talin mikil þörf á auknum viðbúnaði og betri mönnun áhafna.

Frétt af mbl.is

Meta þarf viðbragðsgetu LHG

Í viðtali í 200 mílum í dag segir Georg björgunargetuna hafa verið eflda undanfarin ár með fjölgun þyrluáhafna, nýrri þyrlum og nýju varðskipi. Leitar- og björgunarsvæðið sem LHG ber ábyrgð á er hins vegar stórt, um 1,9 milljónir ferkílómetra. „Á svo stóru svæði er viðbúið að björgunargeta sé að einhverju leyti takmörkuð.“

Ítarlegt viðtal við Georg er sem fyrr segir í blaði 200 mílna sem fylgir Morgunblaðinu í dag.

Eftirlitsflugvélin TF-SIF hefur oft sinnt verkefnum erlendis, en fjarvera hennar er sögð draga verulega úr björgunar- og eftirlitsgetu Landhelgisgæslunnar mbl.is/Árni Sæberg