„Ég einsetti mér að gera allt sem ég gæti gert til þess að ljúka málinu og ég vona þetta sé farsæl lausn, af því að Erla stóð eftir, eftir allt sem á undan hafði gengið.“

Þetta segir Katrín Jakobsdóttir forsætisráðherra í samtali við mbl.is, eftir að tilkynnt var að íslenska ríkið myndi greiða Erlu Bolladóttur 32 milljónir króna í skaðabætur fyrir að hafa haldið henni í gæsluvarðhaldi í 232 daga.

„Mér fannst mikilvægt að við viðurkenndum það að það væri í hæsta máta óeðlilegt og myndi aldrei viðgangast í dag að halda ungri konu í gæsluvarðhaldi í meira en 230 daga, fjarri ungu barni. Mér fannst mjög mikilvægt að við myndum viðurkenna það og biðjast afsökunar á því,“ segir Katrín.

„Ég gleðst ef þetta má verða til þess að ljúka þessum málum sem eru fordæmalaus og vonandi einstök í okkar sögu.“

Frétt af mbl.is

Ríkið greiðir Erlu 32 milljónir í bætur

Ber ábyrgð á að bæta henni þetta

Katrín segist hafa leitað sér ráðgjafar bæði hjá lögfræðingum forsætisráðuneytisins og Andra Árnasyni, settum ríkislögmanni í Guðmundar- og Geirfinnsmálunum frá upphafi.

„Í raun og veru byggjum við þessa ákvörðun bæði á því fordæmi sem er gefið í dómum sem hafa fallið hjá öðrum aðilum – sem sagt þeir dómar sem féllu eftir að lagafrumvarp fór í gegnum þingið – síðan má segja að ég beri ábyrgð á þeirri ákvörðun að lyfta fyrningunni og bæta henni þetta,“ segir hún.

„Í ljósi hversu málið er einstakt fannst mér mikilvægt, rétt og sanngjarnt að hennar hluta í þessu máli yrði lokið líka.“