Skinkuhorn með rjómaosti

40 stykki

• 100 g smjör
• 500 ml nýmjólk
• 1 pk. þurrger (11,8 g)
• 800 g hveiti
• 60 g sykur
• 1 tsk. salt
• 300 g skinka
• 100 g rifinn mozzarellaostur frá Gott í matinn
• 100 g rifinn cheddarostur frá Gott í matinn
• 400 g rjómaostur frá Gott í matinn
• 1 egg
• birkifræ

1. Bræðið smjörið í potti og hellið mjólkinni saman við. Hitið þar til ylvolgt, alls ekki of heitt. Hellið yfir í skál/könnu og verið viss um að geta sett fingurinn í mjólkina án þess að finnast hún of heit.
2. Hrærið þá þurrgerið saman við og leyfið að standa á meðan þið vigtið önnur hráefni. Blandan ætti að freyða örlítið.
3. Vigtið hveiti, sykur og salt í hrærivélarskálina og setjið krókinn á (einnig hægt að hnoða í höndunum í stórri skál).
4. Hellið mjólkurblöndunni saman við og hnoðið í nokkrar mínútur.
5. Penslið skál að innan með matarolíu og veltið deigkúlunni upp úr olíunni, plastið og leyfið að hefast í 40 mínútur. Deigið ætti að tvöfalda stærð sína á þessum tíma.
6. Gott er að útbúa fyllinguna á meðan deigið hefast.
7. Skerið skinkuna í litla bita og blandið saman við báðar tegundir af osti og rjómaosti í skál.
8. Skiptið deiginu í fimm hluta og fletjið hvern og einn út í hring sem er um það bil jafn stór og hefðbundinn matardiskur.
9. Skerið það næst niður með pítsuskera/hníf svo úr verði átta hlutar.
10. Setjið kúfaða teskeið af fyllingu við breiðari endann og rúllið síðan varlega upp.
11. Mikilvægt er síðan að snúa upp á hornin til að koma í veg fyrir að fyllingin leki úr við baksturinn.
12. Raðið hornunum næst á bökunarpappír á bökunarplötu (9-12 stykki á hverja plötu) og hitið ofninn í 200°C.
13. Leyfið þeim að hefast aftur í um 15-20 mínútur, penslið þá með pískuðu eggi og stráið birkifræjum yfir.
14. Bakið í 10-15 mínútur eða þar til hornin fara að gyllast.