Árið 2022 einkenndist af fjölbreyttum förðunartrendum, allt frá kremuðum förðunarvörum yfir í krullur án hita. Samfélagsmiðillinn TikTok hefur án efa sett mark sitt á tískustrauma í förðun á nýliðnu ári, en í ár var það ekki einungis húðin sem ljómaði, heldur líka neglurnar. 

Rakel Ósk Guðbjartsdóttir, snyrtifræðingur og eigandi Eliru, tók saman tíu stærstu förðunartrend ársins 2022 í sínum nýjasta pistli:

1. Augnháraserum

Ef þú varst ekki komin á augnháraserum-lestina þá ertu svo sannarlega komin þangað núna. Úrvalið er gott og hægt að velja án aukaefna, sérstakt fyrir augabrúnir og næringarserum sem styrkir augnhárin. 

2. Kremaðar förðunarvörur

Púðrið hefur verið á undanhaldi í ár og margir farnir að velja kremaðar vörur. Vinsælar eru þær sem hægt er að nota allt í senn á augu, varir og kinnar. Auðveldar í notkun, hægt að nota fingurna eða förðunarbursta til að dreifa þeim. 

3. Krullur án hita

Vörur til að gera krullur í hárið án hita voru klárlega jólagjöfin í ár fyrir yngri dömurnar og hafa sprengt allan TikTok skalann síðustu mánuði. Alveg eins og gamaldags rúllurnar - bara miklu einfaldari. Gefa náttúrulegt og fallegt útlit. 

4. Húðumhirðuhringur (e. Skin Cycling)

Mikið var talað um Skin Cycling á árinu. Þó þetta sé ekki nýtt af nálinni þá voru fleiri og fleiri að tala um þetta og átta sig á hversu gott þetta gerði húðinni þeirra. 

Með Skin Cycling er átt við að notuð séu virk efni þrisvar í viku, að nota efni til að djúphreinsa (e. exfoliate) húðina tvisvar í viku, og á „hvíldardögum“ sé húðin hreinsuð og borið á hana rakakrem. Mikilvægt er að fylgjast með viðbrögðum húðarinnar og bregðast við með þau í huga. 

5. „Glazed Donut“ neglur

Húðin á að vera ljómandi og svo ljómuðu neglurnar líka á árinu. Tískan byrjaði með Hailey Bieber og fór þaðan eins og stormsveipur. Neglurnar líta út eins og sykraðir kleinuhringir og hægt að ná því fram með svokölluðum „holographic“, eða sanseruðum naglalökkum í mjúkum ljósbrúnum lit.   

6. Heitir burstar

Þó að krullur án hita hafi verið vinsælar þá gerðu burstar með hita líka allt vitlaust. Efst á toppnum trónir Dyson Airwrap og það hefur heyrst að hann hafi breytt lífi margra. Þetta var greinilega jólagjöfin í ár á Íslandi, því hann er uppseldur á landinu. 

7. Vaselínmeðferð

Þó að svokallað „slugging“ eða vaselínmeðferð sé ekki ný af nálinni þá var mikil vakning í því að gæta að því hlutverki húðarinnar að vernda okkur gegn sýklum (e. skin barrier). Húðin á okkur leikur lykilhlutverk í að verja okkur gegn sýklum og streituvöldum. Hún er brynjan okkar og nauðsynlegt er að hún haldi vel. 

Sjá allt um vaselínmeðferð hér:

Frétt af mbl.is

Hvað er Slugging?

8. Púðurkvastar

Seint á þessu ári urðu púðurkvastar allt í einu heitasta tólið í förðunarbransanum eftir að hafa legið í dvala í allmörg ár. Nú þarf einn að vera til á hverju heimili til að setja förðunarvörurnar rétt og vel undir augun. 

9. Þykkar og mjúkar brúnir

Þó að það hafi komið nokkrar mínútur þar sem við héldum að Pamelu Anderson-brúnir væru að koma aftur (sem þær gerðu sem betur fer ekki) þá er það búið að vera mjög móðins í ár að greiða brúnirnar upp svo þær virðist fyllri og meiri. Alls konar krem og gel er hægt að fá til að ná hinu fullkomna útliti eða skella sér í svokallað „brow lamination“ á næstu snyrtistofu. 

10. Varaolíur

Þetta byrjaði allt með varaolíunni frá Dior og svo fylgdu önnur merki hratt á eftir. Það sem gerir þær svo vinsælar er hversu rakagefandi og nærandi þær eru fyrir varirnar ásamt því hvað þær gefa vörunum fallega og flotta áferð.