Heildarafli íslenskra fiskiskipa janúar til desember árið 2022 nam 1.417 þúsund tonnum sem er 22% aukning frá árinu á undan. Augljóst er að hina miklu aukningu megi rekja til óvenju stórrar loðnuvertíðar en aflinn í fyrra nam 449.933 tonnum sem er 207% meira en árið á undan, að því er fram kemur í bráðabirgðatölum Hagstofu Íslands.

Nánast engin breyting varð í síld eða kolmunna, en lítilvægur samdráttur varð í makrílafla.

Þá sést að botnfiskafli nam 434.270 tonnum sem er 8% minna en árið á undan. Samdráttinn má að mestu rekja til tæp 30 þúsund tonna samdrátt í þorskafla og 11 þúsund tonn samdrátt í karfa.

Árið 2022 nam flatfiskaflinn 21.502 tonnum sem er 13% samdráttur frá árinu á undan.

Frétt af mbl.is

Skerðing þorskkvóta ígildi veiða 10 togara

Veiðar dragast verulega saman

Í desember síðastliðnum var heildarafli íslenska fiskiskipaflotans 48.264 tonn sem er 62% minna en í sama mánuði árið á undan.

Vissulega má rekja töluvert af samdrættinum til minni loðnukvóta sem hefur gert það að verkum að útgerðir hafa frestað veiðum til að ná verðmætustu loðnunni fram yfir áramót. Það eitt og sér er þó ekki eina skýringin þar sem umtalsverður samdráttur hefur einnig orðið í þorski, ufsa og karfa. Aflatölurnar gefa því merki um að útgerðir eru búnar að draga verulega saman seglin í takti við samdrátt í úthlutuðum aflaheimildum í samræmi við ráðgjöf Hafrannsóknastofnunar um hámarksafla.

Fjölda skipa hefur verið lagt undanfarna mánuði, meðal annars Harðbaki EA, Brynjólfi VE og Stefni ÍS.