Nói Síríus hefur sett á markað nýtt sælgæti sem kallast Eitt Sett Töggur. Um er að ræða gómsætar lakkrís karamellur, hjúpaðar Síríus súkkulaði.

Alda Björk Larsen, markaðsstjóri Nóa Síríus segir það alltaf mikil gleðitíðindi þegar nýjar vörur frá fyrirtækinu birtast í hillum verslana. „Það er sérstaklega gaman að hefja nýtt ár á því að kynna þessa nýjung sem ég veit að beðið hefur verið með eftirvæntingu. Nýju vörurnar í Eitt Sett línunni hafa verið mjög vinsælar,“ segir Alda og bætir við: „Það hefur farið mikil vinna í það undanfarin misseri að fullkomna lakkrís karamelluna og finna rétt hlutfall milli hennar og súkkulaðisins. Útkoman er Eitt Sett Töggur sem við erum afar stolt af því að fá að kynna fyrir landsmönnum nú í byrjun árs.“

Ástarsaga Síríus súkkulaðisins og mjúka lakkríssins hófst fyrir áratugum síðan þegar almenningur tók upp á því að neyta varanna saman. Í kjölfarið fæddist Eitt Sett sem hefur verið eitt eftirlætissælgæti þjóðarinnar allar götur síðan. Nú fæst Eitt Sett í fjórum útgáfum: Eitt Sett Töggur, Eitt Sett súkkulaðistykki, Eitt Sett bitar í endurlokanlegum pokum og svo auðvitað klassíska Síríuslengjan með lakkrísborðanum.