Bandaríski herinn segist hafa gert hnitmiðaðar loftárásir í austurhluta Sýrlands í nótt til að bregðast við drónaárás sem varð einum bandarískum verktaka að bana og særði fimm Bandaríkjamenn til viðbótar.

Bandaríska varnarmálaráðuneytið, Pentagon, sagði í yfirlýsingu að verktakinn hefði verið drepinn og hinir særst „eftir að ómannað loftfar gerði árás á byggingu þar sem viðhaldi er sinnt á herstöð bandamanna skammt frá Hasakah í norðausturhluta Sýrlands“.

Lloyd Austin, varnarmálaráðherra Bandaríkjanna. AFP/Drew Angerer

Annar bandarískur verktaki særðist í árásinni, að sögn Pentagon, sem telur drónann vera íranskan.

Lloyd Austin, varnarmálaráðherra Bandaríkjanna, sagði að með yfirumsjón Joes Bidens Bandaríkjaforseta, hefði hann gefið leyfi fyrir „hnitmiðuðum loftárásum í nótt í austurhluta Sýrlands“. Ráðist var á aðstöðu sem íslamskir uppreisnarhópar sem tengjast Íran hafa notað.

Uppfært kl. 7.50:

Átta voru drepnir í loftárásum Bandaríkjamanna.