Tómas Ellert Tómasson fyrrverandi bæjarfulltrúi Árborgar, segir falskan tón sleginn í Árborg í grein sinni á vefnum Sunnlenska.is í gær.

Tómas gagnrýnir þar formann bæjarráðs og oddvita Sjálfstæðisflokksins í Árborg, Braga Bjarnason, fyrir sjálftöku, en að sögn Tómasar hækkuðu laun Braga um 210 prósent í fyrra. 

Íbúafundur varðandi skuldavanda sveitarfélagsins var haldinn í dag þar sem Bragi ásamt bæjarstjóra Árborgar, Fjólu Steindóru Kristinsdóttur, svaraði fyrir stöðu fjármála sveitarfélagsins.

Frétt af mbl.is

Alvarleg staða uppi í Árborg

Einnig fóru þeir Róbert Ragnarsson og Magnús Kristjánsson, frá fyrirtækinu KPMG, yfir stöðuna og áætlanir til að snúa fjármálum Árborgar á betri veg.

Á fundinum kom meðal annars fram að uppsagnir innan Árborgar væru óhjákvæmilegar vegna fjárhagsstöðu sveitarfélagsins. 

Frétt af mbl.is

Uppsagnir óhjákvæmilegar í Árborg

Launahækkun fyrsta verk meirihluta Sjálfstæðisflokksins

Tillaga um samstarf við KPMG var samþykkt í lok síðasta kjörtímabils, en að sögn Tómasar kusu bæjarfulltrúar Sjálfstæðisflokksins þá gegn tillögunni.

„Í stað þess að ráðast strax í þá vinnu sem búið var að samþykkja í bæjarstjórn, þá var fyrsta verk nýs bæjarstjórnarmeirihluta Sjálfstæðisflokksins að hækka laun formanns bæjarráðs um 210%, ofan á föst bæjarfulltrúalaun og þóknanir fyrir formennsku í fastanefnd og nefndum byggðasamlaganna. Laun og þóknanir sem skila formanni bæjarráðs yfir einni og hálfri milljón króna á mánuði eða 18 milljónir króna á ári.“

Samþykkt var á fundi bæjarstjórnar í júní á síðasta ári að breyta launahlutfalli formanns bæjarráðs úr 21 prósenti upp í 65 prósent, en það bætist ofan á fastalaun hans sem bæjarfulltrúa. 

Vill að formaður endurgreiði íbúum Árborgar

Í grein sinni í gær kvaðst Tómas vonast til þess að ein sparnaðartillaga bæjarstjórnar Árborgar yrði að endurgreiða hluta af launum sínum. 

„Vonandi fá íbúar að sjá á íbúafundi á morgun að ein sparnaðartillagan feli í sér að formaður bæjarráðs dragi til baka sjálftökuna og endurgreiði íbúum sveitarfélagsins oftökuna. Annað er að slá falskan tón í ráðdeildinni.“ 

Spurð hvort áform væru uppi um að skerða laun bæjarfulltrúa, á íbúafundinum í dag, sagði bæjarstjóri að allar þóknanir bæjarfulltrúa hefðu verið lækkaðar um 5 prósent, 1. mars síðastliðinn. 

Í samtali við fréttastofu RÚV í dag sagði Tómas það ekki segja alla söguna.

Kvað hann lækkunina aðeins eiga við um laun hans sem bæjarfulltrúa, en ekki fyrir önnur störf svo sem formennsku hans í bæjarráði. Lækkun hjá Braga væri um 60 þúsund af heildarlaunum hans, að því gefnu að hann sé með 1,2 milljónir á mánuði, en lækkunin sé raunverulega aðeins um 17 þúsund krónur.