Raunveruleikaþættirnir Love is Blind hafa notið gífurlegra vinsælda á streymisveitunni Netflix, en í nótt var síðasti þáttur í fjórðu þáttaröð sýndur og biðu aðdáendur með mikilli eftirvæntingu eftir lokaþættinum. 

Velgengni í stefnumótaþáttum er í besta falli lítil, en þó eru nokkur pör úr fyrstu þremur þáttaröðunum sem fundu ástina í raunveruleikasjónvarpi og eru enn saman í dag. 

Lauren Speed og Cameron Hamilton

Lauren Speed og Cameron Hamilton eru enn hamingjusamlega gift. Skjáskot/Instagram

Hamilton-hjónin eru enn gift. Þau tóku þátt í fyrstu þáttaröð Love is Blind þar sem þau hrifu ekki einungis hvort annað heldur líka áhorfendur. Þau sýndu og sönnuðu fyrir áhorfendum að sönn ást geti myndast í sjónvarpi. 

Amber Pike og Matt Barnett

Amber Pike og Matt Barnett virðast enn vera í skýjunum með hvort annað. Skjáskot/Instagram

Pike og Barnett tóku þátt í fyrstu þáttaröð Love is Blind og eru enn gift í dag. Ástarsaga þeirra er þó ekki fullkomin þar sem meðleikari þeirra, Jessica Batten, ætlaði ekki að gefast upp á að elta Barnett þrátt fyrir að hann væri trúlofaður Pike. Þrátt fyrir ágreining hjónanna eru þau enn hamingjusöm í dag. 

Matt Bolton og Colleen Reed

Matt Bolton og Colleen Reed eru enn gift, en búa þó ekki saman. Skjáskot/Instagram

Bolton og Reed tóku þátt í þriðju þáttaröð Love is Blind. Þau áttu í þó nokkrum deilum í þáttunum en giftu sig að lokum og eru enn gift í dag. Hins vegar búa þau ekki saman eins og er, sama hvað það nú þýðir.

Alexa Alfia og Brennon Lemieux

Ástin blómstrar enn hjá Alexa Alfia og Brennon Lemieux. Skjáskot/Instagram

Alifia og Lemieux urðu ástfangin um leið og þau kynntust í þriðju þáttaröð Love is Blind og eru enn saman í dag. Þau virðast yfir sig ástfangin og voru í miklu uppáhaldi hjá áhorfendum þáttanna.