Uppskriftir | 19. apríl 2023

Miso marineruð bleikja með agúrkusalatssósu

Hér er á ferðinni geggjuð uppskrift úr smiðju Lindu Ben sem við mælum heilshugar með því að þið smakkið.

Miso marineruð bleikja með agúrkusalatssósu

Uppskriftir | 19. apríl 2023

Ljósmynd/Linda Ben

Hér er á ferðinni geggjuð uppskrift úr smiðju Lindu Ben sem við mælum heilshugar með því að þið smakkið.

Best er að útbúa marineringuna með svolitlum fyrirvara og leyfa bleikjunni að draga hana vel í sig. Ef þú nærð að láta bleikjuna liggja í marineringunni í klukkutíma þá er það mjög gott.

Annars er þetta rosalega fljótlegur réttur. Ég elska að bera fram quino sem meðlæti, það er mjög hollt, prótein og trefjaríkt, en fyrst og fremst elska ég hvað það tekur stuttan tíma að elda það. Maður einfaldlega skolar það fyrst í sigti til að ná í burtu beiska bragðinu, svo setjur maður það í pott með vatni, setur lokið á og sýður. Svo u.þ.b. 10-15 mín seinna er það tilbúið. Best er að fluffa það örlítið með gaffli áður en maður ber það fram.

Agúrkusalatið minnir svolítið á raita sósu en er einfaldari. Ágúrkan er sneidd í sneiðar (ég nota alltaf ostaskera í það), grísku jógúrti er blandað saman við lime safa, hunangi og salti&pipar og hellt yfir agúrkurnar.

Miso marineruð bleika með agúrkusalatssósu

1 kg bleika
1/2 dl soja sósa með litlu salti
2 msk. hunang
1 msk. hvítt miso mauk (white miso paste)
1 msk. ólífu olía
4 hvítlauuksgeirar
safi úr 1 lime
2 dl quinoa
Smá graslaukur (má sleppa)

Agúrkusalatssósa

1 agúrka
1 dl grískt jógúrt frá Örnu mjólkurvörum
Safi og börkur af 1/2 lime
1 msk. hunang
Salt og pipar

Aðferð:

Setjið soja sósu, hunang, hvítt miso mauk, ólífu olíu, lime safa og pressaða hvítlauksgeira í skál og hrærið saman.
Setjið bleikjuflökin í eldfastmót og hellið marineringunni yfir. Snúið flökunum svo öfugt þannig að marineringin drekkist inn í bleikjuna. Látið standa í a.m.k. 20 mín.
Kveikið á ofninum, stillið á 200°C.
Setjið quinoað í fínt sigti og skolið það vel. Setjið það svo í pott ásamt 4 dl af vatni. Sjóðið þar til tilbúið u.þ.b. 15 mín, þið finnið að það er alveg mjúkt og meira fluffý.
Á meðan quinoað er að sjóða, snúið bleikjuflökunum aftur við þannig að roðið snúi niður. Setjið inn í ofn og bakið í u.þ.b. 20 mín.
Á meðan bleikjan er inn í ofni, skerið þá agúrkuna í sneiðar. Í aðra skál blandið saman grísku jógúrti, lime safa og berki, hunangi og blandið saman, kryddið með salti og pipar.
Berið fram allt saman og skerið smá graslauk niður ef þið viljið og dreifið yfir.