Breska leikkonan Emma Watson fékk vatnsblandað vín sem barn og stundum gaf pabbi hennar henni dropa af sterkara áfengi. Vegna þess skildi hún aldrei hrifningu hinna unglinganna á áfengi.

Watson viðurkennir þetta í nýlegu viðtali við Financial Times þar sem hún ræðir nýtt ginvörumerki sem hún hefur hleypt af stokkunum ásamt bróður sínum, Alex Watson.

Watson lýsir því að henni hafi þótt furðulegt hversu aðlaðandi áfengi var í augum annarra unglinga í kringum hana og hversu forboðið það var. Sjálf var hún vön því að fá vatnsblandað vín með hádegismatnum og því hafi þetta komið henni mjög á óvart.

Watson, sem er hvað þekktust fyrir hlutverk sitt sem Hermione í Harry Potter-myndunum, dró sig nokkuð úr sviðsljósinu eftir að síðasta mynd hennar kom út árið 2019. Nú er hún mætt á ný í öðru hlutverki, en fjölskyldan hennar hefur verið viðloðandi víngerð síðan á tíunda áratug síðustu aldar.