Uppskriftir | 23. maí 2023

Nýbakað croissant með parmaskinku, ommelettu og osti

Langar þig að koma ástinni á óvart og gleðja hana með morgunverði í rúmið? Þá er þessi samsetning af unaðslega ljúffengu croissant fullkomin til að bræða hjarta ástarinnar. Málið er að vakna snemma og fara í gott bakarí og næla sér í nýbakað croissant sem er bakað á franska vísu og toppa það með áleggi sem getur ekki klikkað. Þeir sem eru lengra komnir í bakstri og hafa nógan tíma geta auðvitað bakað croissant eftir sínu eigin höfði. Hér er á ferðinni sælkera croissant með lítilli ommelettu, osti og léttsteiktri parmaskinku. Uppskriftin er fyrir tvo.

Nýbakað croissant með parmaskinku, ommelettu og osti

Uppskriftir | 23. maí 2023

Að færa ástinni sinni morgunverð upp í rúm er ást. Ljósmynd/Sjöfn

Unaðslega ljúffengt croissant

2 stk. nýbökuð frönsk croissant
4 sneiðar parmaskinka
2 ostsneiðar af eigin vali
2 egg (fyrir ommelettuna)
Gróft salt og pipar eftir smekk
Létt majónes eftir smekk
Sætt franskt sinnep eftir smekk
Ólífuolía til steikingar

Aðferð:

Byrjið á því að píska eitt egg í eina ommelettu.
Hitið ólífuolíu á lítilli pönnu.
Hellið egginu á pönnuna og matreiðið ommelettu án þess að brjóta hana saman.
Kryddið með salti og pipar eftir smekk.
Gerið tvær svona litlar ommelettur.
Léttsteikið síðan 4 sneiðar af parmaskinku.
Skerið bæði croissant-inn í miðjuna, þversum.
Smyrjið botnana tvo með örlitlu létt majónesi og sætu sinnepi.
Setið tvær sneiðar af parmaskinku á hvorn botn.
Bætið við ostasneið á hvorn botn.
Setjið loks ommelettuna yfir á hvorn botn.
Leggið lokið á hvort croissant-ið fyrir sig.
Berið fallega fram á disk og með appelsínusafa með. Mjög gott er að bjóða upp á nýkreistan og ferskan safa með.