Kapp býður nú upp á nýja krapavél fyrir smábáta og var hún hönnuð „frá grunni með því markmiði að þjóna öllum þörfum smábáta bæði í stærð, afköstum og aðgengi,“ að því er segir í fréttatilkynningu. Fram kemur að smæð vélarinnar ætti að gera það mun einfaldara að koma henni fyrir í smábátum og er breiddin á nýju vélinni aðeins 59 sentímetrar, hæðin 100 sentímetrar og dýptin 78 sentímetrar.

„Við hjá KAPP erum afar ánægð og stolt að geta boðið upp á sérhannaða OptimICE krapavél fyrir smábáta. Með vélinni er krapinn framleiddur úr sjó um borð í bátnum og leysir af flöguís. Krapinn umlykur fiskinn og kælir hann mjög fljótt niður undir 0°C og heldur honum í um -0,5°C allan veiðitúrinn, í löndun og flutningum. Við þetta aukast gæðin til muna og hillutíminn lengist um 5-7 daga. Þetta er mikil bylting fyrir smábátaeigendur að geta haft krapavél um borð hjá sér,“ segir Freyr Friðriksson, eigandi Kapp í tilkynningunni.

Krapvélar Kapp fyrir smábáta eru mun minni en vélarnar sem hafa verið í boði til þessa. Mynd/Kapp

Kapp kynnti nýja OptimICE krapavél fyrir smábáta á sjávarútvegssýningunni í Barselóna á Spáni, en vélar undir merkjum OptimIce hafa verið seldar víða um heim allt frá árinu 1999 og eru þær hannaðar, framleiddar, seldar og þjónustaðar af félaginu.

Í Barselóna kynnti Kapp einnig upp á lausn sem nýtir umhverfisvænni kælimiðil og er hægt að nota koltvísýring í stað freons í allar krapavélar félagsins.