Á Michelin-stjörnu veitingastaðnum Aroma endurspeglast hin ómissandi Rómarmatseðill með klassískum ítölskum réttum á fallegri útiverönd sem býður upp á óviðjafnanlegt útsýni yfir Colosseum hringleikahúsið. Colosseum er stærsta hringleikahúsið sem byggt var í Rómaveldi. Gat það upprunalega tekið við 50.000 manns í sæti og var notað fyrir bardaga skylmingaþræla og annarra svipaðra skemmtana. Á síðari tímum er byggingin orðin eins konar tákn fyrir borgina og hið forna Rómaveldi.

Útsýnið á veröndinni er stórfenglegt og ljúft að fá sér drykk á þessum einstaka stað. Skjáskot/Instagram

Staðsettur á lúxushótelinu Palazzo Manfredi

Aroma veitingastaðurinn er staðsettur á lúxushótelinu Palazzo Manfredi. Veitingastaðurinn er niðurkominn á virkilega fallegri þakverönd og er klárlega á listanum yfir bestu þakveitingastaðina sem Rómarborg hefur upp á að bjóða. Af þakinu eru veitingahúsgestir í  yndislegri nærmynd við Colosseum og sögustaði Rómar. Opna eldhúsið er það fyrsta sem gestir sjá og upplifa þegar þeir koma á þennan yndislega veitingastað sem státar af útsýni yfir Rómarborg og er sannarlega eftirminnileg sjón.

Réttirnir er hver öðrum listrænni, úr hágæði hráefni. Skjáskot/Instagram

Aðeins 28 sæti

Veitingastaðurinn er 28 sæta og er í senn innilegur og glæsilegur, tilvalinn fyrir allt frá rómantískum kvöldverði og flest önnur tilefni. Aroma býður upp á frábæran sælkeramat, bæði la carte matseðil eða smakk matseðil með möguleika á að vínþjónn velji hið fullkomna vín fyrir hvern rétt. Panta þarf borð á veitingastaðnum en þar er líka bar og setustofa til að heimsækja ef þú vilt bara gæða þér á kampavínsglasi eða kokteil. Innréttingin á þakveröndinni minnir helst á klassískan þakgarð og hann er opinn allt árið um kring þökk sé útdraganlegu þaki og glergluggum. Aroma er eftirminnilegur veitingastaður með virkilega glæsilegu útsýni, spennandi matseðli og flottri þjónustu.

Boðið er upp á ómissandi Rómarmatseðill með klassískum ítölskum réttum með einstakri framsetningu sem á sér fáa líka. Skjáskot/Instagram

Réttirnir fanga augað og kveikja í matarástinni. Skjáskot/Instagram

Kokkarnir hafa frumlegt hugmyndarflug af skemmtilegum og ljúffengum réttum sem gera matarupplifunina eftirminnilega. Skjáskot/Instagram

Útsýnið yfir Colosseum hringleikahúsið sem er táknrænt fyrir Rómarveldið er óviðjafnalegt. Skjáskot/Instagram

Hugsað er fyrir hverju smáatriði. Skjáskot/Instagram