Finnur Orri Margeirsson kynntist eiginkonu sinni Indíönu Nönnu Jóhannsdóttur árið 2013. Í dag eiga þau tvo syni, Hólmar Orra sem er fimm ára og Jökul Orra sem er tveggja ára. Þau eru með marga bolta á lofti og reka saman æfingastöð GoMove á Kársnesinu, en samhliða því spilar Finnur fótbolta í efstu deild með FH og starfar hjá Reitun við mat á sjálfbærnimálum fyrirtækja og fjárfesta. 

Finnur segir lífið hafa breyst á ótrúlega marga vegu eftir að hann varð faðir í fyrsta sinn fyrir fimm árum, en við það hafi tilfinningaskalinn stækkað gríðarlega. Hann segir augnablikin þegar synir hans komu í heiminn vera ógleymanleg og hvor um sig sérstök.

„Að fara í gegnum fæðingu með konunni minni er eitthvað það magnaðasta sem ég hef upplifað. Ég upplifði mig frekar bjarglausan þar sem mér fannst ég ekki geta hjálpað Indíönu neitt í gegnum fæðingarnar. Ég hef aldrei verið jafn stoltur eins og af Indíönu þegar hún eignaðist strákana okkar,“ útskýrir hann.

Finnur og Indíana hafa verið saman í áratug.

Mikilvægt að vera í góðu jafnvægi

Eftir að eldri sonur þeirra kom í heiminn segir Finnur forgangsröðunina hafa gjörbreyst. „Fyrst um sinn þá er stærsta breytingin að maður setur annan aðila í fyrsta sætið og getur ekki bara hugsað um sjálfan sig. Við Indíana höfum séð að fyrir okkur virkar best að hafa hlutina í góðri rútínu, bæði fyrir okkur og strákana. Þannig setjum við þarfir strákanna oftast sem miðpunkt í skipulaginu okkar,“ segir Finnur.

„Pabbahlutverkið hefur kennt mér ótrúlega mikið um sjálfan mig og hvernig maður þarf að huga að sér til þess að vera í góðu jafnvægi þegar maður er í samskiptum við tvo litla gaura. Heilt yfir þá finnst mér pabbahlutverkið hafa stækkað mig, bæði sem einstakling og sem maka,“ bætir hann við. 

Feðgarnir alsælir saman.

Spurður hvað hafi komið honum mest á óvart við föðurhlutverkið hingað til segir Finnur það vera að töluvert fleiri áskoranir fylgi fjögurra manna fjölskyldu yfir daginn. „Áður en maður eignaðist börn voru dagarnir nokkuð stöðugir, en nú geta sveiflurnar farið fram og til baka á talsvert breiðari tilfinningaskala en áður,“ segir hann. 

Fótboltinn ekki alltaf fjölskylduvænn

Finnur viðurkennir að það sé vissulega mikið púsluspil á köflum að samtvinna fjölskyldulífið, æfingastöðina og fótboltann. „Eins og ég nefndi þá gengur þetta allt upp þegar það er góð rútína hjá öllum, en við fáum einnig góða aðstoð frá fjölskyldunni okkar. Við höfum lært það saman að takast á við álagspunkta og erum farin að gera það nokkuð vel,“ útskýrir hann. 

Finnur segir fótboltann hafa mjög mikil áhrif á fjölskyldulífið enda sé dagskráin þar ekki alltaf fjölskylduvæn. „Æfingarnar hjá mér eru seinnipartinn á virkum dögum þannig að Indíana er með strákana á þeim tíma. Þar sem fótboltatímabilið er yfir sumarið þá höfum við verið að skipuleggja sumrin okkar eftir því en reynum alltaf að enda tímabilið á góðu fríi,“ segir hann.

Finnur segir fótboltann án efa hafa mikil áhrif á fjölskyldulífið, enda sé dagskráin ekki sú fjölskylduvænasta.

Þegar álagið er mikið er mikilvægt að ná að kúpla sig út og slaka á. Spurður hvað þau Indíana gera til að slaka á nefnir Finnur góða þætti og sund. „Ef við erum með einhverja góða þætti til að horfa á þá nýtum við þá oft til þess að slökkva á hausnum. Við erum einnig dugleg að fara í sund eða í heita pottinn á kvöldin til þess að slaka á,“ segir hann.

Finnur og Indíana hafa lært að takast á við álagspunkta og reyna að kúpla sig reglulega út og slaka á.

Svefninn í fyrsta sæti

Spurður hvað hafi reynst mest krefjandi við föðurhlutverkið segir Finnur það vera tímabil af svefnleysi enda sé margt annað sem fari úr skorðunum við það. „Við höfum fundið það þegar svefninn er í góðri rútínu hjá öllum þá gengur allt betur,“ segir hann. 

Á hinn bóginn hefur honum þótt mest gefandi að fylgjast með strákunum sínum tveimur þroskast og læra nýja hluti og hæfni. „Eftir að við eignuðumst Jökul þá hefur einnig verið rosalega gefandi að fylgjast með sambandi þeirra bræðra og hvernig það er að mótast. Vissulega einkennist það þó af hæðum og lægðum hjá þeim,“ segir Finnur og hlær.

Hólmar Orri afar stoltur með nýfæddan bróður sinn.

Í uppeldinu leggja Finnur og Indíana áherslu á að eiga í góðum samskiptum við syni sína og tala við þá á jafningjagrundvelli. „Við reynum að vera til staðar og gefa þeim alla okkar athygli þegar við erum í gæðastundum, sérstaklega þar sem það hefur verið mikið um að vera hjá okkur undanfarið,“ útskýrir hann.

Það er margt spennandi framundan hjá fjölskyldunni sem er þegar farin að huga að sumarfríinu. „Við munum að mestu vera í bænum yfir sumarið og njóta með strákunum. Við verðum með annan fótinn í æfingastöðinni á Kársnesinu þar sem verður skemmtileg sumardagskrá,“ segir Finnur að lokum. 

Fjölskyldan ætlar að njóta sumarsins á Íslandi.