Gígja Þórðardóttir, deildarstjóri sjúkraþjálfunar á Hrafnistu, hefur sett glæsilegt 243 fm parhús sitt við Mánalind í Kópavogi á sölu. 

Húsið er á tveimur hæðum og var byggt árið 1998. Fyrir framan húsið er sjarmerandi verönd með flottum skjólveggjum, en þar hefur verið komið fyrir afar notalegri aðstöðu þar sem hægt er að borða, slaka á og njóta sólarinnar.

Í opnu og björtu alrými á efri hæð hússins er að finna eldhús, stofu og borðstofu. Þar er góð lofthæð og stórir gluggar sem veita útsýni og gefa rýminu glæsibrag. Í stofunni er fallegur arinn sem býr til notalega stemningu, en þaðan er einnig útgengt á svalir.

Alls eru fjögur svefnherbergi og tvö baðherbergi í húsinu. Frá svefnherbergisgangi á neðri hæð hússins er útgengt á afar snyrtilega baklóð sem er hellulögð að hluta og grasivaxin að hluta, en þar er að finna heitan pott og fallegan gróður. 

Sjá á fasteignavef mbl.is: Mánalind 19