Fylgjendum Doja Cat, söngkonu og lagahöfundar, hefur fækkað til muna á samfélagsmiðlinum Instagram á síðustu dögum. Yfir 250 þúsund manns hættu að fylgja stjörnunni eftir að hún fór ófögrum orðum um aðdáendur sína í nýlegri færslu.

Grammy-verðlaunahafinn, sem er 27 ára, gagnrýndi aðdáendur sína á nýjasta samfélagsmiðlinum, Threads, fyrir það eina að kalla sig „kittenz” eða „kettling“.

„Aðdáendur mínir nefna sig ekki s**t,” skrifaði Doja Cat í færslunni. „Ef þú kýst að kalla þig kettling, þá þýðir það aðeins eitt, þú þarft að hætta í símanum, fá þér vinnu og hjálpa foreldrum þínum með heimilið,” hélt hún áfram.

„Ekkert án aðdáenda sinna”

Aðdáendareikningur söngkonunnar Taylor Swift blandaði sér inn í umræðuna og sagði að Doja Cat væri „ekkert” án aðdáenda sinna sem hafa stutt söngkonuna „í gegnum súrt og sætt”. Doja Cat eyddi Threads-reikningi sínum í kjölfar skilaboðanna.

Neikvæð orðræða Doju Cat varð einnig til þess að nokkrar af stærstu aðdáendasíðum söngkonunnar, þar á meðal The Kittens Room, Doja HQ og Doja Cat News, eyddu Twitter-reikningum sínum.

Það er mjög algengt að stórir aðdáendahópar Hollywood-stjarna gefi sér nafn sem tengist stjörnunni og má þar nefna aðdáendur Beyoncé sem kalla sig „The Bee-hive eða „býflugnabúið“ og aðdáendur Taylor Swift sem kallast „Swifties“.