Katrín Jakobsdóttir forsætisráðherra sýndi málstað strandveiðisjómanna skilning á fundi hennar með fulltrúum þeirra á mánudag, en kvaðst vilja sjá hvaða tillögur til umbóta komi úr stefnumótunarverkefninu „Auðlindin okkar“ sem Svandís Svavarsdóttir matvælaráðherra hrinnti af stað á síðasta ári.

Þetta kemur fram í bréfi sem Landssamband smábátaeigenda (LS) hefur sent félagsmönnum um fudninn. Gert er ráð fyrir að tillögur starfshópa sem skipaðir voru í tengslum við „Auðlindina okkar“ verði kynntar í þessum mánuði.

Frétt af mbl.is

Tillögur um sjávarútvegskerfið kynntar í ágúst

Fram kemur að á fundinum sem LS hafði óskað eftir hafi auk forsætisráðherra verið viðstaddir þeir Arthur Bogason formaður LS, Magnús Jónsson formaður Drangeyjar – smábátafélags Skagafjarðar og Kjartan Sveinsson formaður Strandveiðifélags Íslands.

Í bréfinu segir að rætt hafi verið meðal annars um:

• „Strandveiðikerfið er eini gluggi almennings að fiskveiðum hér við land. Það var sett á árið 2009 vegna þess að framkvæmd aflamarkskerfisns var talið fara gegn mannréttindum.
• Handfæraveiðar eru jafngamlar byggð á Íslandi og eru umhverfisvænustu veiðar sem stundaðar eru hérlendis. Hvorki hér né annars staðar í heiminum hafa slíkar veiðar ógnað fiskistofnum.
• Strandveiðar hafa sannað sig sem viðspyrna gegn þeirri hnignun sem margar sjávarbyggðir haf mátt þola.
• Nú er hins vegar blikur á lofti þar sem margar útgerðir á B- og C-svæðum hafa annaðhvort þegar flutt sig yfir á A-svæði eða eru að undirbúa það. Frumvarp Matvælaráðherra leysir ekki þann vanda. Ágreiningur sá sem ríkt hefur milli svæða mun einungis flytjast inn á hvert svæði fyrir sig. Eina lausnin er að tryggja öllum sama dagafjölda, eins og stendur í núgildandi lögum.
• Strandveiðikerfið er sóknarmarkskerfi og þarf að vera að öllu leyti aðskilið frá aflamarkskerfinu. Til þess að það geti orðið þarf að vera sveigjanleiki í ráðgjöf Hafró og að breytilegur afli strandveiðanna sé ekki inni í 20% aflareglu.“

Frétt af mbl.is

Vilja fund með forsætisráðherra vegna strandveiðibanns

Ræddu tilraunakerfi

Þá var „þeirri hugmynd var varpað fram á fundinum að gera 3-5 ára tilraun með að leyfa 4x12 veiðidaga á strandveiðum (skv. lögum) án þess að setja upp fyrirfram niðurneglt heildaraflamark. Í lok tilraunatímabilsins yrði staðan metin, bæði fiskifræðilega og hver þróunin hafi orðið í fjöldi strandveiðibáta.“

„Forsætisráðherra sýndi málflutningi okkar skilning en lagði áherslu á að hún vildi sjá hvað kæmi út úr vinnu stóru nefnarinnar sem starfar undir heitinu „Auðlindin okkar“,“ segir að lokum.

Strandveiðar voru stöðvaðar 12. júlí þegar tíu þúsund tonna aflaheimildir í þorski sem ráðstafaðar voru veiðunum kláruðust. Strandveiðisjómenn hafa um langt skeið krafist að fá að veiða í 12 daga í maí, júní, júlí og ágúst eins og gert var ráð fyrir þegar veiðikerfinu var komið á, en síðustu ár hafa heimildirnar klárast löngu áður en veiðitímabilinu lýkur.

Frétt af mbl.is

Kveiktu í neyðarblysum fyrir framan Alþingishúsið