Touquet-Paris-Plage-flugvöllurinn í bænum Le Touquet í Norður-Frakklandi verður endurnefndur til heiðurs Elísabetar II. drottningar sem lést hinn 8. september á síðasta ári 96 ára að aldri. 

Frétt af mbl.is

Elísabet drottning látin

BBC greinir frá því að upphaflega tillagan hafi verið borin fram við bresku krúnuna sex dögum eftir andlát drottningarinnar. Í tilkynningu sem ráðhúsið í Le Touquet birti á dögunum kemur fram að konungurinn hafi nú gefið nafninu blessun sína og því verði nafni flugvallarins breytt í Elizabeth II Le Touquet-Paris-Plage-alþjóðaflugvöllurinn. Ekki hefur verið ákveðið hvenær vígslan fer fram. 

„Breskasti“ franski dvalarstaðurinn

„Að Karl III. konungur hafi samþykkt tillögu borgarstjórans í Le Touquet styrkir enn frekar stefnu þess síðarnefnda sem vill staðfesta að Le Touquet sé „breskasti“ franski dvalarstaðurinn,“ var skrifað í tilkynninguna.

Flugvöllurinn var hannaður í kringum 1930 til að bjóða Breta velkomna í strandbæinn sem er í um klukkutíma akstursfjarlægð frá Calais. Bærinn vonast nú til að nýtt nafn flugvallarins muni styrkja tengslin milli Le Touquet og Bretlands.