Leikkonan Drea de Matteo, sem gerði garðinn frægan í hlutverki sínu sem Adriana La Cerva í mafíuþáttunum Sopranos, hefur nú stofnað aðgang á áskriftarsíðu OnlyFans. De Matteo rukkar áskrifendur sína um 15 bandaríkjadali á mánuði eða því sem samsvarar rétt tæplega tvö þúsundum krónum. 

De Matteo situr nakin á dýnu, íklædd leðurstígvélum og með sígarettu á kynningarmyndinni fyrir áskriftarsíðuna og sést glitta í aðra konu sem liggur á gólfinu við fætur leikkonunnar.

Vinsældir vefsíðunnar OnlyFans fara sívaxandi en hún var stofnuð árið 2016. Margar þekktar stjörnur úr Hollywood-heiminum nýta miðilinn til þess að ná sér í frekari tekjur og athygli með því að selja myndir og myndbönd ásamt klámfengnu efni. Á meðal þeirra sem halda úti áskriftarsíðum á miðlinum eru Denise Richards, Iggy Azalea, Cardi B., Carmen Electra, DJ Khaled, Chris Brown og nú de Matteo. 

Lítið hefur spurst til Sopranos-stjörnunnar síðastliðin ár en hún fór með burðarhlutverk í þáttaröðunum Desperate Housewives, Sons of Anarchy og Joey eftir að hlutverki hennar í Sopranos lauk. 

De Matteo hlaut Emmy-verðlaun fyrir leik sinn í mafíuþáttunum árið 2004.