Kim Jong Un, leiðtogi Norður-Kór­eu, tjáði Vla­dimír Pútín, forseta Rússlands, á fundi þeirra í Rússlandi í dag að hann sé viss um að Rússar vinni mikinn sigur í stríðinu við Úkraínu.

„Við erum þess fullviss um að rússneski herinn og fólkið muni vinna stóran sigur í réttlátri baráttu til að refsa illum hópum sem sækjast eftir yfirráðum, útrás og metnaði,“ sagði Kim við Pútin þegar þeir lyftu glösum yfir kvöldverði.

Frétt af mbl.is

Öll viðfangsefni til umræðu á fundinum

Pútín hrósaði samvinnu og vináttu á milli þjóðanna og sagði að hann sæi möguleika á hernaðarsamstarfi við Norður-Kóreu. Pútín hafði áður sagt að Rússar gætu aðstoðað N-Kóreumenn við byggingu gervihnatta.

Gamall vinur betri en tveir nýir

Vopnabúr Norður-Kóreumanna hefur valdið ótta og áhyggjum nágrannalanda þeirra og beinast áhyggjurnar ekki síst að því að Norður-Kóreumenn útvegi Rússum vopn í stríðinu við Úkraínu í skiptum fyrir aðstoð þeirra í þróun og byggingu gervihnatta. Bandarískir embættismenn og sérfræðingar hafa sagt að Rússar hafi mikinn áhuga á að kaupa vopnin.

„Gamall vinur er betri en tveir nýir,“ sagði Pútín á fundinum, sem stóð yfir í um tvær klukkustundir, og vitnaði í rússneskt spakmæli og vísaði til hlutverks Sovétríkjanna í Kóreustríðinu.

Kim Jong Un og Vla­dimír Pútín takast í hendur fyrir fund þeirra í Vostochny-geim­ferðastöðinni. AFP