„Samkeppniseftirlitið þarf að gera ráðstafanir til að endurheimta traust og það er á ábyrgð forstjórans að gera þær ráðstafanir, hvernig svo sem að því verður staðið.“

Þetta segir Sigríður Margrét Oddsdóttir, framkvæmdastjóri Samtaka atvinnulífsins, í samtali við Morgunblaðið, spurð við hvað sé átt í pistli á heimasíðu samtakanna, þar sem segir að mikilvægt sé að gerðar verði ráðstafanir til að stofnunin geti endurheimt traust í kjölfar niðurstöðu áfrýjunarnefndar samkeppnismála í máli Brims gegn eftirlitinu.

Samkeppniseftirlitið og matvælaráðuneytið gerðu samning um athugun SKE á stjórnunar- og eignatengslum í sjávarútvegi sem áfrýjunarnefnd samkeppnismála úrskurðaði ólögmæta.

Beindi Samkeppnisstofnun fjölmörgum spurningum til fyrirtækjanna og áttu svörin að varpa ljósi á fyrrgreind stjórnunar- og eignatengsl. Meðal þess sem krafist var svara við var hvaða hluthafar mættu á hvern hluthafafund og aðrir aðilar sem mættu fyrir hönd hluthafa. Auk þess vildi stofnunin fá að vita hvernig hver hluthafi greiddi atkvæði á umræddum fundum í hverju máli fyrir sig.

Einnig var krafist afrita af fundargerðum hluthafafunda frá 1. janúar 2020 sem og upplýsingum um hvaða hluthafar mættu á hvern hluthafafund og aðrir aðilar sem mættu fyrir hönd hluthafa. Auk þess vildi stofnunin fá upplýsingar um nafn, kennitölu og eignarhlut hvers hluthafa, sem og skipan stjórna félaganna og breytingar sem orðið hafa frá 1. janúar 2020 sem öllum eru aðgengilegar á vef Skattsins.