Ragnheiður Jónsdóttir hélt skemmtilegt útgáfuboð á dögunum en hennar fyrsta skáldverk Blóðmjólk var að koma út hjá Bjarti Veröld. Vel var mætt í boðið enda Ragnheiður vinsæl og vinamörg. Ragnheiður vann Svartfuglinn á dögunum, en um glæpasagnaverðlaun er að ræða sem rithöfundarnir Yrsa Sigurðardóttir og Ragnar Jónasson standa að ásamt bókaútgáfunni. 

Blóðmjólk fjallar um vinkvennahóp sem verður fyrir miklu áfalli þegar ein úr hópnum deyr með hræðilegum hætti. Sjónarhornið flakkar á milli kvennanna þannig að lesandinn kynnist persónunum frá ýmsum hliðum. Hvað gerðist eiginlega? Og ef það var framinn glæpur, hver er hinn seki? 

Ragnheiður er gift tveggja barna móðir sem býr í Bandaríkjunum ásamt eiginmanni sínum, Benedikt Skúlasyni. Hún er íslenskufræðingur og vann áður hjá Árnastofnun og í forsætisráðuneytinu áður en hún geystist fram á ritvöllinn.