Katrín Björk Gunnarsdóttir er búsett í Kaupmannahöfn ásamt kærasta sínum Malachi Morse og starfar þar sem sérfræðingur í markaðsmálum. Hún hefur alla tíð haft mikinn áhuga á heilsu og lagt sig fram við að lifa heilbrigðum lífsstíl.

Katrín hefur mikla ástríðu fyrir hreyfingu og er dugleg að stunda fjölbreytta líkamsrækt, allt frá crossfit og lyftingum yfir í pílates og göngur. Áhugi hennar á næringu kviknaði hins vegar út frá magavandamálum sem hún hefur verið að glíma við frá barnsaldri, en hún hefur bæði verið greind með iðrabólgu (IBS) og vélindabakflæði (GERD). 

„Einkennin eru misslæm, en þegar ég er sem verst hefur það mikil áhrif á andlegu hliðina líka þar sem þetta hefur mjög mikil áhrif á daglegt líf,“ segir Katrín. 

Katrín hefur verið búsett í Kaupmannahöfn í fjögur ár og kann afar vel við sig í borginni.

Þarf að hugsa mikið um mataræðið

Aðspurð segist Katrín almennt hugsa mikið um mataræðið sitt, enda sé það nauðsynlegt til þess að hún geti haldið meltingunni í góðu standi. „Ég passa mig að borða mikið af hreinu próteini eins og fiski, kjúklingi, rækjum og tófú ásamt grænmeti, fitu og trefjum. Einnig skiptir hreyfing miklu máli og mér finnst mjög mikilvægt að stunda hreyfingu af einhverju tagi þrisvar til fjórum sinnum í viku. Ég elska pílates, crossfit, lyftingar og göngutúra,“ segir hún.

„Það helsta sem ég geri fyrir andlegu heilsuna er að hugleiða, en ég nota ýmis forrit í símanum til þess, t.d. Calm og Insight Timer. Þar er hægt að finna leiddar hugleiðslur sem mér finnst virka best fyrir mig. Ég finn mikinn mun þegar ég gef mér tíma til þess að hugleiða þótt ég mætti vera enn duglegri við það, en mér finnst það hafa svo góð áhrif á kvíða og stress,“ bætir hún við.

Katrín leggur mikla áherslu á að borða hreint prótein ásamt grænmeti, fitu og trefjum.

„Ég hef fengið greiningar en engar almennilegar lausnir“

Þrátt fyrir að hafa fengið greiningar á magavandamálum sínum segist Katrín í raun ekki hafa fengið neinar almennilegar lausnir sem hafa virkað fyrir hana frá læknum og sérfræðingum. „Ég hef prófað allskonar vörur og lyf til þess að komast yfir vandamálin en það virðist aldrei neitt virka,“ segir hún.

„Nýverið rakst ég hins vegar á nýjar vörur frá merkinu Nordbo fyrir tilviljun í apóteki í Kaupmannahöfn sem ég ákvað að prófa, enda er ég alltaf í leit að nýjum lausnum í von um að finna eitthvað sem virkar. Ég fann mun á meltingunni minni, en ógleðin fór minnkandi og uppþemban hvarf á innan við tveimur vikum. Það var ótrúlegt fyrir einhvern sem hefur glímt við magavandamál í mörg ár og reynt allt,“ segir hún.

„Það var þess vegna sem ég fékk áhuga á því að kynna þessar vörur fyrir sem flestum og ákvað að byrja að selja vörurnar á Íslandi. Eins og er þá erum við með vefverslun og erum að fara að selja vörurnar í apótekum og völdum verslunum,“ segir hún.

„Ég prófaði fyrst Mage-vítamínið fyrir magavandamál og þá byrjaði loksins eitthvað að breytast. Í kjölfarið fór ég að prófa fleiri vörur frá þeim.“

Fær sér alltaf sama morgunmatinn

Aðspurð segist Katrín hafa fundið hina fullkomnu morgunrútínu, en hún fær sér alltaf sama morgunmatinn. „Ég vakna, fer í sturtu og geri mig til fyrir vinnuna. Síðan bý ég til bananapönnukökur sem ég fæ bara ekki leið á. Ég nota einn banana, tvö til þrjú egg, hafra, kanil og salt – set það allt í blandara og svo beint á pönnuna. Síðan toppa ég þær yfirleitt með hnetusmjöri og berjum. Einfalt, gott og sjúklega hollt!

Ég elska að byrja daginn á próteinríkum morgunmat, en það gerir gæfumuninn fyrir mig inn í daginn. Svo tek ég alltaf „probiotics“ magagerla á morgnanna og er þessa stundina að taka gerla frá Nordbo, en magagerlar eru nauðsynlegir fyrir meltinguna mína en hafa einnig góð áhrif á andlegu heilsuna, þ.e. stress og kvíða.“

Eftir að hafa fengið sér próteinríkan morgunmat tekur Katrín inn Lacti Mood „probiotics“ magagerla.

Kvöldrútína Katrínar byrjar síðan alltaf á eldamennsku, en hún veit fátt betra en að elda hollan og góðan mat með kærastanum sínum. „Rækju-taco eru í miklu uppáhaldi þessa dagana, og svo slaka ég á yfir þætti eða bók og finnst líka gott að hugleiða fyrir svefninn. Svo tek ég alltaf Magnesium frá Nordbo sem hefur hjálpað mér mikið fyrir svefn ásamt vítamínum sem styrka heilbrigða þarma- og ristilvirkni,“ segir hún.

Katrín veit fátt betra en að elda góðan og næringarríkan kvöldmat með kærasta sínum.