„Útivist er í miklum blóma á meðal Íslendinga. Framboðið af ævintýraferðum er fjölbreytt og fólk vill búa sér til skemmtilegar minningar og njóta þess sem veröldin býður upp á. Við erum vænlegur kostur og með margra ára reynslu í þeim efnum,“ segir Guðmundur Gunnlaugsson, sölu- og fararstjóri hjá Fjallakofanum-Ævintýraferðum. 

Ferðaskrifstofan Fjallakofinn-Ævintýraferðir sérhæfir sig í útivistar- og ævintýraferðum sem hreyfa við hug og hjörtum ævintýrafólks á öllum aldri. Úrval ferða sem boðið er upp á hjá Fjallakofanum-Ævintýraferðum eru af fjölbreyttum toga og henta öllum þeim sem hafa gaman af útivist. 

Skíðaferðir með Fjallakofanum-Ævintýraferðum eru sígildar og mjög vinsælar. Samsett mynd

Fjölbreytt úrval ævintýraferða

„Ferðirnar sem ég kem að eru fjölbreyttar, hvort sem það eru göngu-, hjóla- eða skíðaferðir, en einnig menningarferðir,“ segir Guðmundur sem hefur í góð 30 ár verið viðloðandi útivistarbransann.

„Ég hef alltaf haft ástríðu fyrir útivist og hreyfingu og má þá sérstaklega nefna skíðaferðirnar, en í seinni tíð hafa bæst við göngu- og hjólaferðir. Ég hef verið lánsamur í því að ferðir á mínum vegum hafa verið eftirsóttar og meðal áfangastaða í þeim ævintýraferðum sem ég mun stýra eru helstu göngu- og skíðaparadísir Ítalíu, Austurríkis, Frakklands og Þýskalands,“ segir hann og er með þéttbókað dagatal í fararstjórn á vegum Fjallakofans-Ævintýraferða út árið 2024. 

Leiðir þeirra Guðmundar og Halldórs Hreinssonar, eiganda Fjallakofans, hafa oft legið saman í gegnum tíðina. Enda tala þeir sama tungumál þegar útivist og hreyfing er annars vegar. mbl.is/Eyþór Árnason

„Í upphafi nýs árs er á dagskrá skíðaferð á æðislegt skíðasvæði í Cortina d‘Ampezzo í febrúar. Í ágúst verð ég svo með hjóla- og gönguferð nálægt Trier í Suður Þýskalandi og í september ætla ég svo með hóp í menningarferð til Munchen, en þar ætla ég að fara á Októberfest, stærstu bjórhátíð í heimi. Það er stórkostleg upplifun sem allir ættu að prófa að minnsta kosti einu sinni á lífsleiðinni,“ listar hann upp og segist jafnframt vera farinn að undirbúa skíðaferð í janúar 2025 svo það er nóg um að vera fram undan hjá Fjallakofanum-Ævintýraferðum.

„Núna eiga menningarferðir af ýmsum toga vaxandi fylgi að fagna og eru ýmsar útfærslur ferða í boði. Til dæmis háfjallaferðir og margs konar fjölskyldu-, árshátíðar- og fyrirtækjaferðir sem hefur fjölgað hjá okkur þar sem við sníðum utan um þarfir hvers hóps. Við höfum getað sýnt fram á þetta tvennt sem skiptir svo miklu máli þegar að fara skal með hóp erlendis, það er sanngjarnt verð og vönduð vinnubrögð.“

Guðmundur hefur mikla unun af því að ganga á fjöll um víða veröld í góðum félagsskap. Samsett mynd

Reynsla og fagmennska númer eitt

Guðmundur er reynslumikill fararstjóri og útivistarmaður sem brennur fyrir almennri útivist og hreyfingu. 

„Þegar ég var barnungur var leiksvæðið mitt á fjöllum. Þar gat ég verið að eltast við kindur í smalamennsku og síðan tóku skíðin við um leið og snjórinn lagðist yfir fjöllin,“ minnist hann en Guðmundur er fæddur og uppalinn á Ísafirði þar sem alls staðar gafst kostur á útivist og fjallamennsku í nærumhverfinu. Þau forréttindi segir hann hafa ýtt undir áhugann á útivist sem hann hefur lagt í vana sinn að stunda allan ársins hring, óháð árstíðum. 

Þú færð allt fyrir útivistina í verslun Fjallakofans. mbl.is/Eyþór Árnason

„Ég myndi segja að það sé mér í blóð borið að stunda almenna útivist. Mér þykir sérlega gaman að fara í gönguferðir með frábærum göngufélögum. Á sumrin bætist svo hjólið við en á veturna er það skíðaiðkun sem tekur að mestu yfir, hvort sem það eru svig,- göngu- eða fjallaskíði. Allt er þetta mjög gefandi, en fyrir mig er það ekki síst félagsskapurinn og allt það góða sem heilnæm hreyfing og útivist gefur manni sem kallar á mig og hvetur til útivistar,“ segir Guðmundur sem einnig hefur mikla reynslu í skíðaþjálfun. 

„Skíðaiðkun er stór hluti í mínu lífi og keppti ég lengi með skíðadeild ÍR á sínum tíma. Seinna meir fór ég út í skíðaþjálfun og í 21 ár þjálfaði ég börn og unglinga til keppni, bæði í Reykjavík og á landsbyggðinni,“ segir hann.

„Það er fátt sem ég hef gert sem hefur gefið mér meira en einmitt að fylgjast með aukinni færni og getu barna og unglinga á skíðum og oft hitti ég fólk sem er fullt þakklætis fyrir þennan góða tíma. Það var nú ekki mikið spurt um laun fyrir þessa vinnu enda hefur mikið starf á vegum skíðadeildanna verið unnið í sjálfboðavinnu,“ lýsir Guðmundur sem segist fullur tilhlökkunar fyrir aðkomu sinni í næstu ferðum á vegum Fjallakofans-Ævintýraferða.

Fjallakofinn-Ævintýraferðir býður upp á margs konar skemmtilegar ferðir þar sem útivist og hreyfing er í forgrunni. Samsett mynd

Mikil tilhlökkun

„Mínar ferðir eru hugsaðar sem hrein viðbót við þær fjölbreyttu ferðir sem hafa verið í boði hjá skrifstofunni í gegnum árin. Í þær eru allir velkomnir, byrjendur sem lengra komnir. Ég hef alltaf litið svo á að mitt framlag sem fararstjóri sé að færa ferðirnar til þeirra sem vilja njóta þess að búa til góðar minningar hvort sem er í skíðaferðum eða öðrum hreyfiferðum og þannig er stefnt að því að aðild mín að Fjallakofanum-Ævintýraferðum verði,“ segir hann og bætir við:

„Ég er stoltur og auðmjúkur að stíga inn í þau verkefni sem mér eru falin hjá Fjallakofanum-Ævintýraferðum og mun gera það af fagmennsku,“ segir Guðmundur að lokum.

Á heimasíðu ferðaskrifstofu Fjallakofans-Ævintýraferða eru hagnýtar upplýsingar um úrval ferða og bókunarferlið. Einnig er hægt að senda tölvupóst á netfangið ferdir@fjallakofinn.is til þess að skrá þátttöku og/eða fá nánari upplýsingar um ferðir á döfinni eða sérsniðnar ferðir.