Raunveruleikastjarnan Mike „The Situation“ Sorrentino viðurkenndi nýverið að hafa eytt 500 þúsund bandaríkjadölum eða um 70 milljónum íslenskra króna í eiturlyf. Sorrentino, sem var í aðalhlutverki í raunveruleikaþættinum Jersey Shore á árunum 2009 til 2012, sagði vinsældir þáttarins hafa kynt undir eiturlyfjafíkn sína og ranghugmyndir um vinsældir. 

„Ég eyddi hálfri milljón í kókaín og oxýkódon,“ sagði Sorrentino í viðtali við Entertainment Tonight sem birtist á mánudag. „Ég var villtur. Ég var hömlulaus. Ég var kærulaus. Eiturlyfin náðu heljartaki á mér,“ útskýrði hann. Sorrentino viðurkenndi að vinsældir þáttarins, athyglin og peningastreymið gerðu lífið ekki auðveldara fyrir mann eins og hann. „Ég átti allt og hafði aðgang að öllu. Ég var með eiturlyf út um allt, falin í töskunni og jafnvel í skónum.“

Sorrentino fór í meðferð árið 2015 og hefur verið edrú alla daga síðan. Hann á von á sínu þriðja barni snemma á næsta ári.