„Dáleiðsla virkar,“ segir Jón Víðis Jakobsson, dáleiðari og töframaður sem hefur um  áratugaskeið boðið upp á dáleiðslumeðferðir hjá Dáleiðslumiðstöðinni ásamt því að reka Dáleiðsluskólann Hugareflingu. 

Sjálfum hefur Jóni tekist að losa sig við rúmlega 30 kíló með aðstoð dáleiðslu en í fyrstu viðurkennir hann að hafa ekki trúað á virkni dáleiðslumeðferða. Ekki fyrr en hann upplifði virknina á eigin skinni. 

„Ég lærði fyrst dáleiðslu á Íslandi en síðan fór ég til Las Vegas til að læra sviðsdáleiðslu því ég ætlaði bara að nota þetta sem trikk í töfrabrögðunum,“ lýsir Jón upphafi dáleiðslu ævintýrisins í Dagmálum.

30 kílóum léttari

Í Las Vegas kynntist hann fyrirbæri sem kallast sýndarmagabandsaðgerð sem hann ákvað að fræðast meira um og læra að beita sjálfum sér og öðrum. Jón segir svokallaða magabandsdáleiðslu hafa gert kraftaverk fyrir sig þar sem hann hafi náð að viðhalda heilbrigðri þyngdarstjórnun með fyrrnefndri dáleiðslutækni.

„Ég ætlaði aldrei að láta dáleiða mig. En svo þegar ég uppgötvaði að þetta væri sjálfsdáleiðsla og að það er enginn annar að gera neitt við þig þá sá ég það að það var engin ógn í þessu, þetta var ekkert hættulegt,“ segir hann og lýsir því hvaða áhrif magabandsdáleiðslan hafði strax á hann.

Dáleiðsla er ekki djók

„Ég fékk mér einn bita af hamborgaranum og mig bara langaði ekki í meira. Ég var bara saddur og það kom mér verulega á óvart,“ segir Jón og nefnir að svengdartilfinning eigi það til að hverfa þegar sýndarmagabandsdáleiðslu er beitt.

Sú tilfinning var einmitt það sem leiddi til þeirrar lífstílsbreytingar sem Jón hefur náð að tileinka sér síðustu ár. Síðan þá hefur hann gagnvirkt aðstoða aðra með að gera slíkt hið sama með samtali og ímyndunaraflinu, sem hann segir vera undirstöðuatriðin í dáleiðslu. 

„Dáleiðsla virkar á allt sem er huglægt. Dáleiðsla hjálpar þér að breyta því sem þú vilt breyta.“

Frétt af mbl.is

Dáleiðsla getur mögulega losað þig við lyfin