Uppskriftir | 30. desember 2023

Hreindýralundir með rósmarín- og einiberjasósu

Við hjónin vitum fátt betra en að töfra fram sælkerakræsingar um hátíðirnar og í miklu uppáhaldi er villibráð. Við höfum skapa okkur þá hefð að vera með humar og hreindýralundir á nýárskvöld með ljúffengu meðlæti sem flýgur með bragðlaukana á hæstu hæðir. Humarinn stendur ávallt fyrir sínu og hann grillum við í hvítlauks- og steinseljusmjöri sem bráðnar í munni. Hreindýralundirnar eru sannkallaður veislumatur, meyrar og silkimjúkar. Ég ber hreindýralundirnar fram með dýrðlegri villibráðarsósu, rósmarín- og einiberjasósu, sem parast á fullkomnaðan hátt með hreindýrinu. Síðan er ég með möndlukartöflur, franska útgáfu af kartöflum, niðursoðnar perur með hrútaberjasultu, rósakál í balsamic og hunangsgljáðar regnbogagulrætur. Ég deili hér með ykkur uppskriftinni að hreindýralundunum og villibráðarsósunni og eldunin á lundunum skiptir sköpun.

Hreindýralundir með rósmarín- og einiberjasósu

Uppskriftir | 30. desember 2023

Hreindýralundir eru sannakallaður hátíðarmatur. Samsett mynd

Dýrðlegt tvist að bjóða upp á grillaðan humar og hreindýralundir í aðalrétt. Haf og hagi í hátíðarbúning. Ljósmynd/Sjöfn

Hreindýralundir og rósmarín- og einiberjavillibráðarsósu

Hreindýralundir

1kghreindýralundir
Salt og pipar eftir smekk

Aðferð:

Krydda til með salt og pipar eftir smekk
Steikja lundirnar í 2-3 mínútur á hvorri hlið.
Setjið hreindýralundirnar beint inn í ofn við 180°C í um það bil 8 mínútur.
Kjarnhitinn á að vera um 48°C.

Rósmarín einiberjasósa

2 msk. olía
3 stk. skalotlaukur
4 rif hvítlaukur
10 einiber
1 stk. stjörnuanís
2 greinar rósmarín
3 msk. síróp
3 msk. balsamik edik
800 ml nautasoð í fernu/eða hreindýrasoð (fæst í Melabúðinni)
80 g smjör
1-2 msk. rifsberja eða hrútaberjasulta frá Skriðuklaustri
1 peli rjómi eða eftir smekk

Aðferð:

Skerið laukana gróft niður.
Hitið pott með olíu í og steikið laukinn við miðlungs hita þar til hann verður glær. Bætið einiberjum, stjörnuanís og rósmarín út í og steikið aðeins áfram.
Bætið loks sírópi og ediki út í og leyfið því að karamellast aðeins og sjóða saman þar til það þykkist.
Bætið nautasoðinu/hreindýrasoðinu út í og sjóðið niður um helming eða þar til hún er orðin þykk.
Sigtið sósuna og pískið smjörinu saman við hana.
Hægt að bæta rjóma og/eða sultu út í til að breyta sósunni algjörlega.
Berið fram með ljúffengu meðlæti sem parast vel með hreindýralundunum.