Gönguleiðin frá biðstöð Strætó við Bústaðaveg hjá Litluhlíð að Perlunni verður endurbætt með stígagerð og nýjum tengingum.

Þetta kemur fram í tilkynningu frá Reykjavíkurborg.

Sjá ekki Perluna fyrir skógi

Fram kemur að erfitt hafi reynst fyrir ferðamenn og aðra sem ætla að Perlunni frá Bústaðavegi að átta sig á bestu leið þangað, enda skyggi skógurinn í Öskjuhlíð á Perluna frá biðskýlinu og því sé hún nær ósýnileg.

Á endurbættur stígur að gera aðkomu að Perlunni og Öskjuhlíðinni mun betri fyrir þá sem koma frá Bústaðavegi.

Á endurbættur stígur að gera aðkomu að Perlunni og Öskjuhlíðinni mun betri. mbl.is/Árni Sæberg

Vegurinn snjóbræddur

„Annars vegar verður um að ræða sveigða og aðgengilega leið að Perlunni að mestu í legu eldri stígs og hins vegar tröppur, sem nýtast þeim sem geta og vilja fara beinustu leiðina. Þessi leið mun til að mynda einnig nýtast íbúum í Hlíðum vel en stígurinn mun tengjast inn í upplifunar- og heilsubótarstíginn Perlufestina,“ segir í tilkynningunni.

Gert er ráð fyrir að stígurinn verði upplýstur og snjóbræddur.

Umhverfis og skipulagsráð Reykjavíkur samþykkti á fundi sínum 10. janúar að veita heimild fyrir áframhaldandi undirbúningi, verkhönnun og gerð útboðsgagna vegna stígagerðarinnar.