Þorrablót Grafarvogs var haldið hátíðlegt laugardagskvöldið 20. janúar í Egilshöll en 1200 manns mættu á blótið. Meðal annars var boðið upp á alvöru þorramat, hákarl, brennivín og með því. Grafarvogsbúar kunna að skemmta sér en þemað á þorrablótinu var níundi áratugurinn. 

Grafarvogskóngurinn Guðlaugur Þór Þórðarson, umhverfis-, orku- og loftslagsráðherra, var að sjálfsögðu mættur. Bogi Nils Boga­son, for­stjóri Icelanda­ir, er einnig harður Grafarvogsmaður og var hann einnig mættur í samkvæmið. 

Gestir mættu ýmist í sparifötunum eða fötum í anda liðinnar tíðar. Dagskráin og tónlistin endurspeglaði þema kvöldsins. Regína Ósk stýrði kvöldinu og hljómsveitin Nýju fötin keisarans spilaði. Margrét Eir steig fyrst á svið og tók á móti gestum þegar þeir mættu. 80's kóngurinn Eyfi sá um einskonar brekkusöng í Egilshöllinni. 

Grafarvogsprinsinn Kristmundur Axel steig á svið og á eftir honum var það leynigestur kvöldsins sem var enginn annar en Herbert Guðmundsson. Þau Friðrik Dór, Sigga Beinteins og Daníel Ágúst stigu síðan á svið.

Eins og sjá má á myndunum var gríðarlega mikil stemning í Grafarvoginum á laugardaginn.