Dagbjört Jónsdóttir, lögfræðingur og manneskjan á bak við Fundið fé, stendur fyrir sparnaðarátak sem hún kallar Eyðslulaus febrúar. Þetta er sjöunda árið í röð sem Dagbjört sparar sérstaklega mikið í febrúar. 

„Eyðslulaus febrúar snýst um að núllstilla alla óþarfa eyðslu. Það má þannig líkja þessum mánuði við fjárhagslega föstu þar sem við lærum að segja nei við alls konar og draga úr útgjöldum sem ekki eru nauðsynleg. Það er nefnilega hollt að segja nei við sig endrum og sinnum,“ segir Dagbjört þegar hún er spurð út í átakið. 

„Reglurnar í eyðslulausum febrúar eru einfaldar. Það á ekki að kaupa neinn óþarfa heldur á að halda sig við nauðsynjavörur, gera matarlista með áætlun hversu mikið verður eytt – og standa við áætlunina. Af því að við erum í föstu þá eru bakarís- og skyndibitaheimsóknir ekki leyfðar heldur er allt keypt úr matvörubúð. Skiptir þar engu þó þú eigir afgang af áætluninni þinni. Sama gildir um innleggsnótur og gjafabréf, það á ekki að nota þau þar sem tilgangurinn er að „detox-a“ alla eyðslu sem er ekki mikilvæg. Þú skilgreinir hvaða útgjöld eru nauðsynleg, en útgjöld eins og matur, lyf- og lækniskostnaður myndi að sjálfsögðu falla undir nauðsynjar. Þú munt finna í byrjun næsta mánaðar breytingar og þú njóta þess betur þegar þú pantar þér næst kaffibolla á kaffihúsi.“

Dagbjört segir að ástæðan fyrir eyðslulausum febrúar vera þríþætt. 

„Í fyrsta lagi finn ég hvað það gerir mér gott að taka einn mánuð þar sem ég dreg úr allri óþarfa eyðslu. Í öðru lagi gerir fastan það að verkum að viðbótarpeningur situr eftir í febrúar. Ég næ því að leggja þá upphæð inn á ferðasjóð fjölskyldunnar. Í þriðja lagi er þetta skemmtilegt verkefni sem hvetur börnin á heimilinu til að spara. Ég hef það að venju að ef það verður afgangur af mataráætluninni þá nýtum við fjölskyldan upphæðina í eitthvað skemmtilegt sem við gerum síðan saman í mars. Í fyrra nýttum við afganginn til að fara út að borða og í bíó. Börn læra mikið á að taka þátt í verkefni sem þessu og er gott veganesti fyrir þau.“

Ekki hægt að ætla sér of mikið

Hvað finnst þér hafa nýst sérstaklega vel þegar þú ferð í eyðslulausan mánuð?

„Það sem mér þykir best er að skipuleggja vel matarinnkaup og skrá niður öll útgjöld viku fyrir viku. Í lok hverrar viku fer ég síðan yfir stöðuna og skoða hvað var vel gert en hvar rými er til bætinga.“

Er eitthvað sem þú hélst að væri sniðugt en var ekki?

„Að setja sér óraunhæfar væntingar um minnkun útgjalda er ekki vænlegt til árangurs í eyðslulausum febrúar. Ekki setja þér markmið um að draga úr matarkostnaði um helming í þessar fjórar vikur. Áætlunin og fjárhagslega markmiðið þurfa að vera raunhæf. Það þarf að vera úthald næstu 29 daga.“

Það skiptir máli að skipuleggja matarinnkaupin vel. Ljósmynd/Getty images

Nú eru útsölur í hámarki, er ekki sniðugt að versla á þeim?

„Vissulega getur verið gott að nýta sér góð tilboð á útsölum, en það þá þarf að forðast öll skyndikaup. Veltu því fyrir þér hvort að þessi innkaup dragi þig fjær eða færi þig nær þínum fjárhagslegu markmiðum. Ef þau draga þig frá markmiði þínu og eru ekki nauðsynleg þá er betra að sleppa þessum innkaupum. En ef þetta er hlutur sem passar við þitt fjárhagslega markmið og þína áætlun, þá getur verið heppilegur kostur að nýta sér útsölur.“

Hefur þú tekið saman hvað þú hefur sparað mikið í eyðslulausum mánuðum?

„Yfirleitt næ ég að draga úr matarkostnaði um um það bil 20 prósent í eyðslulausum febrúar. Að sama skapi sparast allur kostnaður sem annars hefði farið í skyndibita, veitingastaði, bakarí, bíó eða aðrar skemmtanir.“

Dagbjört mælir með að spara en ætla sér ekki of mikið. mbl.is/Eggert

Safnaði fyrir draumaferðinni 

Ertu að gera þetta til þess að safna fyrir einhverju ákveðnu?

„Ég er alltaf með ákveðið takmark og set mér fjárhagsleg markmið. Fjárhagsleg markmið eru mín hvatning við að spara og vera skynsöm með peningana mína. Árið 2023 fór í að safna fyrir draumaferð fjölskyldunnar til Bandaríkjanna og eyddum við jólum og áramótunum þar.“

Ef það er eitthvað eitt sem fólk ætti að gera, hvað er það?

„Ef ég ætti að gefa eitt gott sparnaðarráð þá er það að setja sér fjárhagslegt markmið! Það hljómar kannski sérkennilega en vel skipulagt fjárhagslegt markmið er undirstaða þess að ná árangri í fjármálum. Þetta markmið verður síðan hvatningin á þínu fjárhagslega ferðalagi. Trúðu mér – það virkar,“ segir Dagbjört að lokum.