Frumvarpið um kvótasetningu grásleppuveiða var flutt af meirihluta atvinnuveganefndar á þriðjudag og er samhljóða frumvarpi sem matvælaráðherra kynnti á vorþingi á síðasta ári en fékkst ekki afgreitt fyrir þinglok.

Frétt af mbl.is

Fiskveiðifrumvörp Svandísar ekki afgreidd

Þórarinn Ingi Pétursson, þingmaður Framsóknarflokksins og formaður atvinnuveganefndar, viðurkenndi í ræðupúlti Alþingis á þriðjudag að meirihluti nefndarinnar hefði lagt frumvarp um kvótasetningu fram að beiðni matvælaráðherra, Svandísar Svavarsdóttur, sem nú er í veikindaleyfi.

„Þetta er bara döpur staða. Það er sorglegt að horfa upp á að haldið sé áfram að kvótasetja auðlindirnar okkar eins og það hefur verið gert með fyrirheit um að það eigi að skila sér til samfélagsins, en það hefur ekki gerst,“ segir Inga innt álits á málinu.

Þaulskipulagt

Veikindi ráðherra hafa ekkert með það að gera hvernig málinu er teflt fram að sögn Ingu, sem segir Svandísi hafa getað lagt fram frumvarpið allt frá því að þing hófst síðasta haust. Fullyrðir hún að um sé að ræða þaulskipulagða aðgerð í þeim tilgangi að fría VG ábyrgð á innihaldi frumvarpsins.

„Það sjá það allir að þau eru ekki að fylgja stefnu síns flokks og að grásrótin sé óánægð með að þau hafi snúið frá sjávarútvegsstefnunni sinni. Þau voru oft búin að boða stefnu sem sneri að því að verja sjávarbyggðirnar og vernda það sem hægt væri að vernda úr því sem búið er að skemma. En svona fór nú það og nú á að kvótasetja eina ferðina enn,“ segir Inga.

Nánar má lesa um málið í Morgunblaðinu í dag.