Óskarsverðlaunaleikkonan Hilary Swank hefur svipt hulunni af nöfnum tvíbura sinna, rúmlega tíu mánuðum eftir fæðingu þeirra.

Leikkonan, sem þekktust er fyrir hlutverk sín í kvikmyndunum Million Dollar Baby, P.S. I Love You og Boys Don't Cry, fæddi í apríl á síðasta ári, dreng og stúlku, en hefur kosið að halda börnunum frá sviðsljósinu að mestu. Swank hefur birt örfáar myndir af tvíburunum á Instagram en sýnir aldrei andlit þeirra. 

Leikkonan birti færslu á Instagram í gærdag sem sýnir börnin á ströndinni. Myndin sýnir ekki andlit þeirra en nöfn tvíburanna, sem heita Aya og Ohm, eru rituð í sandinn.

Swank var 48 ára gömul þegar börnin komu í heiminn. Hún tilkynnti um fæðingu tvíburanna á páskadag með fallegri mynd á Instagram.

Frétt af mbl.is

Eignaðist tvíbura 48 ára