Ítalía er þekkt fyrir fallegt landslag, ríka sögu og ljúffenga matargerð sem laðar að sér tugi milljóna ferðalanga á ári hverju, en árið 2022 voru yfir 75 milljónir sem heimsóttu landið. 

Ferðavefur Condé Nast Traveller tók saman lista yfir bestu strendurnar á Ítalíu sem þú verður að heimsækja í ár. 

Cala Goloritzé

Cala Goloritzé-ströndin þykir ein sú fallegasta í Sardiníu, en hún var einnig valin önnur fegursta strönd í Evrópu árið 2021. Ströndin er staðsett við bæinn Baunei í suðurhluta Orosei-flóa og varð til við skriðufall árið 1962. Þangað er aðeins hægt að komast með báti eða um stíg sem liggur að ströndinni, en gönguferðin tekur um einn og hálfan tíma. 

Fólk þarf að leggja aðeins meira á sig til þess að komast á ströndina, en þegar þangað er komið blasir við ótrúleg fegurð sem gerir það vel þess virði. Ljósmynd/Unsplash/Glenn Souer

Monterosso al Mare

Montoresso al Mare er einn af fimm bæjum í Clinque Terre á Norður-Ítalíu. Það er margt heillandi við bæinn, þar á meðal tvær töfrandi strendur sem þú hreinlega verður að heimsækja. Yfir sumartímann fyllast þær af litríkum sólhlífum og sólþyrstu fólki sem kælir sig inn á milli í fagurbláum sjónum.

Það vantar ekki upp á fegurðina á þessari strönd! Ljósmynd/Unsplash/Michele Marchesi

San Fruttuoso

Í um 20 mínútna ferjufjarlægð eða þriggja klukkustunda göngufjarlægð frá Portofino finnur þú San Fruttuoso, afskekktan 300 metra langan flóa með hvítum sandi og blágrænum kristaltærum sjó. San Fruttuoso er fallegur bær, en þar er einn strandklúbbur og nokkrir veitingastaðir og því fullkomið að fara þangað í dagsferð og sleikja sólina á ströndinni. 

Það er fullkomið að skella sér í dagsferð til San Fruttuoso og slaka þar á við sjóinn. Ljósmynd/Unsplash/Limbo Hu

Maiori

Landslag Amalfi-strandarinnar sem liggur meðfram suðurhluta Ítalíu er stórbrotið, en það einkennist af tignarlegum klettum sem steypast niður í sjó. Það þýðir þó að meðfram ströndinni eru ekki of margar sandstrendur, en þær eru þó nokkrar og þar á meðal er töfrandi strönd í bænum Maiori sem er þekkt fyrir að heilla ferðalanga upp úr skónum. 

Amalfi-strandlengjan er þekkt fyrir magnað landslag og mikla fegurð. Ljósmynd/Unsplash/Nellia Kurme

Tropea

Þessi sögufrægi bær í Kalabríu-héraði á vesturströnd Ítalíu var valinn fallegasti bær Ítalíu árið 2021. Það er því ekki við neinu öðru að búast en að strendur bæjarins séu guðdómlegar, sem þær eru sannarlega.

Bærinn var valinn sá fegursti á Ítalíu árið 2021. Ljósmynd/Unsplash/Petr Slováček