Kaldbakur EA er orðinn stórglæsilegur eftir að hafa fengið yfirhalningu. Var á dögunum lokið við að mála ísfisktogarann í Slippnum á Akureyri auk þess sem unnið var að viðhaldi. Alls tók verkefnið um fjórar vikur og stóðust allar tímaáætlanir, segir Sigurður Rögnvaldsson verkefnastjóri hjá útgerðarsviði Samherja í færslu á vef útgerðarinnar.

Systurskipin Björg EA og Björgúlfur EA fengu álíka meðferð á síðasta ári.

Frétt af mbl.is

„Skipin eru eins og ný“

„Skrokkur skipsins var málaður, einnig millidekk og lestarrými. Kaldbakur er sjö ára gamalt skip og þess vegna þótti skynsamlegt að ráðast í nokkrar endurbætur, svo sem upptekt á aðalvél og lagfæringar á stýrisbúnaði. Þessi systurskip hafa reynst afskaplega vel í alla staði en með tímanum þarf auðvitað að huga að fyrirbyggjandi endurbótum og þeim er nú lokið. Við getum hiklaust sagt að skipin séu í topp standi, þökk sé útgerð og áhöfnum skipanna,“ segir Sigurður.

Þá var skrúfan á Kaldbak máluð með hágæða botnmálningu, sem ætlað er að draga úr olíunotkun. Skrúfan á Björgu EA var einnig máluð fyrir nokkru síðan með sömu málningu.

„Yfirleitt eru skrúfur skipa ekki málaðar en tilraunir með það hafa verið gerðar á undanförnum árum. Málningin hindrar að gróður festist á skrúfunni, sem eykur viðnám hennar í sjónum og þar með olíunotkun. Það er vissulega erfitt að mæla árangurinn nákvæmlega en við höfum trú á að þessi hágæða málning komi til með að skila tilætluðum árangri,“ útskýrir Sigurður.

Það er ekki lítið verkefni að mála togara. Ljósmynd/Samherji

Skrúfan á Kaldbaki var máluð með sérstakri málningu til að ná betri eldsneytisnýtingu. Ljósmynd/Samherji

KAldbakur var orðinn fallegur þegar togarinn yfirgaf Slippinn. Ljósmynd/Samherji