„Við leggjum til lóðina og svo erum við að leigja tíma úr Þjóðarhöllinni til þess að tryggja félögunum aðgengi að þessum mannvirkjum,“ segir Einar Þorsteinsson borgarstjóri um nýja Þjóðarhöll sem gert er ráð fyrir að hafist verði handa við að reisa á næsta ári.

Segir hann höllina gríðarlega lyftistöng fyrir íþróttalíf í Laugardal, til dæmis búi Ármann og Þróttur ekki við nægilega góðan húsakost í dag, „og hér er verið að margfalda þann tímafjölda sem félögin hafa aðild að. Við erum að tala um æfingaöryggi, félögin kvarta yfir því að þegar haldnar eru sýningar eða landsleikir í Laugardalshöllinni sé börnunum ýtt út. Með þessari framkvæmd tryggjum við æfingaöryggi en líka það að félögin geti vaxið,“ segir borgarstjóri.

Frétt af mbl.is

Segjast munu hefja byggingu á næsta ári

Hann segir það gleðilegt að málið sé komið á þennan stað. „Þetta undirstrikar það að Reykjavík er höfuðborg íþróttanna og hérna í Laugardalnum slær hjartað. Hérna viljum við hafa þau mannvirki sem hýsa stærstu leikina, alltaf þegar þjóðin er að keppa að einhverju mikilvægu erum við hérna í Laugardalnum, það er vel við hæfi að nú séum við að byggja Þjóðarhöll en svo eru borg og ríki að ræða önnur mannvirki, svo sem þjóðarleikvang, en þetta er fókusinn núna,“ segir borgarstjóri.

Rosalega mikið vægi

Aðspurður kveður hann metnaðarfullar hugmyndir á sínum tíma hafa verið uppi um hvernig þjóðarleikvangur fyrir knattspyrnu ætti að líta út. „Það hefur gengið erfiðlega að finna rekstrarform fyrir slíkan leikvang. Þessi Þjóðarhöll, frá sjónarhóli Reykjavíkurborgar, hefur rosalega mikið vægi,“ segir Einar, „íþróttafélögin í dalnum og skólarnir geta nýtt þessa höll,“ heldur hann áfram og bendir um leið á að þjóðarleikvangur sé öðruvísi mannvirki með öðruvísi hlutverk.

Einar borgarstjóri, Jón Arnór, formaður stjórnar Þjóðarhallar, Ásmundur Einar, mennta- og barnamálaráðherra, og Þórdís Kolbrún fjármálaráðherra. mbl.is/Kristinn Magnússon

„Nú er ekki búið að birta nákvæmlega hvernig kostnaðarskiptingin er en við leggjum til lóð og svo tryggjum við rekstrargrundvöll með því að leigja tíma,“ svarar Einar spurningu um hver hluti borgarinnar verði í kostnaði við byggingu hallarinnar.

Er sætafjöldinn 8.600 hugsaður til framtíðar þegar litið er til fjölgunar þjóðarinnar og stórmóta?

„Ég held að þetta sé bara mjög metnaðarfullt,“ svarar borgarstjóri, „húsið er hannað með það í huga að það nýtist okkur sem best, hægt er að skipta salnum uppi í fjóra velli þannig að nýtingin sé sem best en það er líka nægt rými fyrir áhorfendur þannig að hægt sé að halda stórmót hér með miklum sóma. Eins tekur hönnunin mið af því að það sé auðvelt að halda hér viðburði, ráðstefnur, tónleika og slíkt. Þetta hús varð til í Þrándheimi í Noregi og við erum svolítið að taka þetta módel þar og koma með það hingað, gera þetta dálítið einfalt,“ útskýrir borgarstjóri.

Frétt af mbl.is

Telur Þjóðarhöll eiga að vera í algjörum forgangi

Þar hafi tvær aðrar hallir verið fyrir þegar þetta hús hafi verið byggt þar og nú verði þessi þrískipting – samrekstur þriggja húsa með fjölnota gildi – nýtt á Íslandi. „Við erum ekki að finna upp hjólið, við erum að taka eitthvað sem virkar, stytta okkur tíma með því í stað þess að fara í flókna og dýra hönnunarsamkeppni sem verktakar eiga svo kannski í erfiðleikum með að uppfylla. Við erum bara að taka hér lausn og skelli henni hérna niður og það er mjög mikilvægt, því tíminn skiptir máli,“ segir Einar Þorsteinsson borgarstjóri að lokum.