Engin svör hafa borist fjármálaráðuneytinu frá Bankasýslu ríkisins í tengslum við möguleg kaup Landsbankans á TM.

Frétt af mbl.is

Skýrt að ríkisbanki eigi ekki að kaupa TM

Þetta staðfestir Elva Björk Sverrisdóttir, upplýsingafulltrúi fjármála- og efnahagsráðuneytisins, við mbl.is.

Hún bætir við að gera megi ráð fyrir að svarið berist síðar í vikunni.

Þórdís Kolbrún Reykfjörð Gylfadóttir fjármálaráðherra sagðist í síðustu viku ætla að bíða eftir viðbrögðum Bankasýslunnar sem væru væntanleg í þessari viku áður en hún vildi tjá sig frekar um málið.

Landsbankinn. mbl.is/sisi

Bankasýslan hefur sagt að hún hafi ekki verið meðvituð um kaupin en Landsbankinn svaraði fullum hálsi í greinagerð þar sem segir að hún hefði ítrekað verið upplýst um áformin.

„Bankinn hefur sent frá sér sín svör og Bankasýslan mun svara því. Í framhaldinu er hægt að meta næstu skref. En það er þó ljóst að málinu er ekki lokið,“ sagði Þórdís Kolbrún, við mbl.is á föstudaginn.

Ekki náðist í Þórdísi Kolbrúnu við vinnslu fréttarinnar.