Uppskriftir | 3. maí 2024

Guðdómlega góð naan-brauð bökuð í úti-pítsaofni

Nú er það helgarbaksturinn ljúfi sem er fastur liður á föstudögum. Að þessu sinni er það uppskrift að naan-brauðum sem kemur úr smiðju Sigríðar Bjarkar Bragadóttur matreiðslumeistara og sælkera hjá Salt Eldhúsi en hún er snillingur í brauðbakstri. Hún er líka búin að finna réttu leiðinni þegar baka á naan-brauð. En naan-brauð er frábært að baka í úti-pítsaofnunum sem nú eru að tröllríða markaðinum.

Guðdómlega góð naan-brauð bökuð í úti-pítsaofni

Uppskriftir | 3. maí 2024

Sigríður Björk Bragadóttir kann listina þegar baka skal naan-brauð í útipítsaofni. Samsett mynd

„Eftir nokkrar tilraunir, brennd brauð og hrá innan í tókst okkur að ná frábærum árangri og gera gómsæt brauð. Ýmislegt þarf að hafa í huga t.d. að hafa brauðin þunn, of þykk brauð geta orðið hrá innan í þegar þau eru orðin bökuð utan á. Gott er að gera bara eitt í einu og passið að hafa vel af hveiti á spaðanum svo brauðið festist ekki við og ekki láta brauðin bíða á spaðanum. Ekki setja of mikið af smjöri, bara þunnt lag, þá er auðveldara að baka það,“ segir Sigríður sem er komin með góða reynslu á því að baka naan-brauð í pítsaofninum sínum góða.

Girnilegt naan-brauðið. Ljósmynd/Sigríður Björk Bragadóttir

Naan-brauð í gas-pítsaofni

4 brauð

350 g hveiti
2 tsk. þurrger
½ tsk. lyftiduft
2 tsk. sykur
1 tsk. salt
125 ml vatn
150 g hrein jógúrt
80 g smjör, brætt
3-4 hvítlauksgeirar
hnefafylli steinselja eða 2 tsk. nigellufræ

Aðferð:

Setjið hveiti, þurrger, lyftiduft, sykur og salt í hrærivélaskál og blandið saman.
Hitið vatn og jógúrt saman þar til ylvolgt (36°C).
Hellið vökva út í þurrefnin og hnoðið mjög vel saman með deigkróknum.
Setjið klút yfir og látið bíða á hlýjum stað í 30-60 mínútur eða þar til deigið hefur tvöfaldast í stærð.
Bræðið smjör í potti, saxið hvítlaukinn og setjið út í ásamt steinselju eða nigellufræjum og hafið tilbúið með pensli.
Hitið pítsaofninn með steininum í um það bil 380°C hita.
Skiptið deiginu í 4 hluta og fletjið hvern út jafnóðum og setjið á deigspaðann með vel af hveiti undir svo auðvelt verði að losa það á steininn í ofninn.
Penslið brauðið með smjörinu og setjið hvítlauksbitana með á brauðið.
Lækkið svolítið hitann á ofninum með því að minnka örlítið gasstreymið.
Bakið brauðið eitt í einu og verið vakandi fyrir því að snúa því hluta úr hring allan tímann svo það bakist jafnt.
Berið fram með því sem hugurinn girnist.