Klippa úr bandaríska spurningaþættinum Family Feud í umsjón grínistans Steve Harvey fór á mikið flug á samfélagsmiðlum nú á dögunum.

Þátttakandi að nafni Kenya gerði allt vitlaust með óvæntu svari sínu og eru netverjar margir hverjir sammála um að svar hennar sé það besta í sögu þáttarins, en Family Feud hefur verið í loftinu frá árinu 1976. 

Í hverjum þætti keppa tvær fjölskyldur, en leikurinn samanstendur af skemmtilegum spurningum sem keppendur þurfa að leysa í sameiningu. 

Flestar konur tengja

Kenya tók þátt ásamt fjölskyldu sinni fyrir rétt tæpu ári síðan og heillaði Harvey og áhorfendur í sjónvarpssal með hreinskilni sinni, húmor og eintómri snilli. 

Harvey, sem hefur stjórnað þættinum frá árinu 2010, spurði þátttakendur hvaðan eða frá hverjum þeir hefðu hlotið hvað mestan stuðning í gegnum ævina.

Flestir þátttakendur nefndu fjölskyldumeðlim, vin, gæludýr eða vinnufélaga en Kenya hristi vel upp í leiknum þegar hún sagði mesta stuðninginn vera frá brjóstahaldaranum sínum.

Mikil fagnaðarlæti brutust út í sjónvarpssal þegar Kenya greindi frá svari sínu. Hún hlaut dynjandi lófaklapp frá Harvey, áhorfendum og þátttakendum, enda átti hún það fyllilega skilið.